چه‌كدارێن یه‌كینه‌یێن پاراستنا گه‌ل یه‌په‌گێ، ب فه‌رمانا قه‌ندیلێ و ب ته‌رزێ سه‌رباز و ئیستخباراتێن رژێما صه‌دامی، ده‌ست هاڤێتییه ره‌ڤاندنا كه‌سوكارێن پێشمه‌رگه‌یێ رۆژ ل رۆژئاڤا كوردستانێ، د 24 ده‌ژمێرێن ده‌رباسبوویی دا، هه‌ژماره‌كا وه‌لاتییان ره‌ڤاندینه كو بابێن پێشمه‌رگه‌هانه.
چاڤكانیێن پێگه‌ها داركا مازی ل رۆژئاڤا كوردستانێ ئه‌شكه‌ره كر، د 24 ده‌مژمێرێن ده‌رباسبوویی دا، چه‌كدارێن یه‌په‌گێ ب ئۆتۆمبێلێن سه‌ربازی و چه‌كێن گران ڤه، ب سه‌ر گوندێ ب ناڤێ «تۆكل» یێ گرێدای «دێركێ» ل رۆژئاڤا كوردستانێ دا گرتنه، چه‌كداران ل ده‌ستپێكێ گوللـه هاڤێتن و پشتره ب سه‌ر مالان دا گرتن ژ بۆ پشكنین و لێگه‌رینێ.
ده‌ست نیشان كر، ئه‌ڤ بوویه‌ر ل ده‌مژمێر 4:00 سپێدێ رۆژا ئەینی 18\12\2020ێ چێبوویه، چه‌كدارێن یه‌په‌گێ پاش كو ئێریشی مالان كری و ده‌ریێن وان شكاندین، 4 وه‌لاتی كو ژ كه‌سوكارێن پێشمه‌رگه‌یێ رۆژ ن، ژ گوندی ره‌ڤاندن و ناڤێن وان ئه‌ڤنه:
عه‌بدولمه‌ناف مه‌حموود عومه‌ر
محه‌مه‌د سه‌لیم ده‌روێش ئیبراهیم
عه‌بدولعه‌زیز عومه‌ر سلێمان
عه‌بدولعه‌زیز حاجی مه‌حموود سلێمان
تێ زانین ئه‌ڤ كه‌س ته‌مه‌نێ وان د نێڤبه‌را 48 هه‌یا 67 سالان دا نه، كوڕێن وان د ناڤا رێزێن پێشمه‌رگه‌هێ رۆژ دا نه.
چاڤكانیێن پێگه‌ها مه ئه‌شكه‌ره كرن، كانێ ب چ ئاوا له‌شكرێن رژێما سه‌دام بێرێزی ب كه‌سوكارێن پێشمه‌رگه‌هان دكرن، چه‌كدارێن یه‌په‌گێ ژی بێرێزی ب ڤان كه‌سان كرنه، ده‌ست و چاڤێن وان گرێدانه و بۆ جهه‌كێ نه‌دیار ره‌ڤاندنه كو هه‌تا نها چ ئاگاهییه‌ك ژێ نایێ زانین.
ل گۆری ئاگاهیێن كو تایبه‌ت ژ بۆ پێگه‌ها مه هاتنه شاندن، چه‌كدارێن یه‌په‌گێ ب فه‌رمانا قه‌ندیلێ ئه‌ڤ كارێ ب ته‌رزێ ته‌رۆرێ ئه‌نجام داییه، وه‌كه تۆلهلدانه‌ك ژ بۆی ئێریشا دوو رۆژێن رابووری یا سحێلا، وه‌ختا كو هه‌ژماره‌كا چه‌كدارێن وان خوه‌ستی ب رێكێن نه‌مه‌شرۆع سنۆرێن باشوورێ كوردستانێ ببه‌زینن، لێ به‌لێ ژ پال هێزێن پێشمه‌رگه ڤه رێ لێ هاتییه گرتن.
چه‌كدارێن یه‌په‌گێ ل ده‌ستپێكێ مینا ته‌رۆریستێن داعشێ گوند ب ئۆتۆمبێلێن له‌شكری دۆرپێچ كر و پشتره ب ته‌رزێ ته‌رۆریستان گوللـه ئاڤێتن و ئێریشی مالێن وان كه‌سان كرنه.
ل باشوورێ كوردستانێ ژی ل سه‌رده‌ما ره‌ژیما به‌عس یا صه‌دام حسێن، له‌شكر و هێزێن ئیستخباراتا رژێما به‌رێ، ب هه‌مان ئاوایی ب سه‌ر گوندان دا دگرتن و كه‌سوكارێن پێشمه‌رگه‌هان د ره‌ڤاندن.
