هاریکارێ وەزیرێ پێشمەرگە یێن ھەرێما کوردستانێ، سەربەست لەزگین دیار کر کو رێخستنا پەکەکێ شەنگال داگیر کریە و ل ئیراقێ ھندەک کۆم ژی ل گەل پەکەکێ هەڤکاریێ دکەن.
لەزگین ژ بۆ کەنالێ کوردستان ٢٤ێ داخویانی دا و تێدا پرسگرێکا پەکەکێ یا کۆ شەنگال داگیرکری و پێدڤیە ل گۆری رێکەفتنا د ناڤبەرا ھەولێر و بەغدایێ دا ژ شەنگالێ خوە ڤەکێشەیت، نرخاند.
د ئاخافتنا خوە دا لەزگین گۆت: “ل شەنگالێ پەکەکە و کۆمێن گرێدایی وێ هێژان ژی د ناڤا شەنگالێ دانە. ئەو ھەرێم داگیر کرینە و ل وێ دەرێ دسەکنن. ل ئیراقێ ھندەک کۆم ژی هاریکاریا پەکەکێ دکەن و هەڤبەشن د گەل دا. حەتا کار گەهشتیە مەرحەلەیەکا وەها کو پەکەکە جل و بەرگێن وان کۆمان دکەتە بەر خوە و هاتن وچوونێ دکەن. د ھەمان دەمێ دا ئەو گرووپ ژ حکوومەتا ناڤەندی یا ئیراقێ مووچە ژی دستینن”.
سەرۆکوەزیرێ ھەرێما کوردستانێ مەسروور بارزانی د 9ێ بەرفانبارێ دا داخویانی دا و گۆت: “ئەم ل بەندێ نە کو پەیمانا شەنگالێ بهێتە جێبەجێکرن لێ هێژان رێکەفتن وەکە خوە نەهاتیە جێبەجێکرن. پەکەکە و هیچ ھێزێکا دی یا نەیاسایی ژ شەنگالێ دەرنەکەتنە. ب تەنێ ژ بۆ چەند دەمژمێران جل و بەرگ گوھەرتن و ڤەکشین چیایێ شەنگالێ و پاشێ دیسا ڤەگەریان ناڤا شەنگالێ دا. ھەژمارا وان ژی زێدەتر بوو”.
د ناڤبەرا بەغدا و ھەولێرێ د جۆتمەھێ دا پەیمانا شەنگالێ ھاتبوو ئیمزاکرن و ل گۆر پەیمانێ پێدڤیە هەموو هێزێن نە یاسایی د ناڤدا پەکەکە رێخستنا پەکەکێ ژ شەنگالێ دەرکەڤن.
پشتی رێکەفتنێ حکوومەتا بەغدایێ ھێزێن پۆلێسان ل شەنگالێ ب جی کرن و دۆسیەیا ئەولەھیێ ئێختن بن کۆنترۆلا خوە دا.
