نڤیسکارێ ناڤدارێ ترکیێ و دۆستێ کوردان ئیسماعیل بەشیکچی دبێژیت پەکەکە ل سەر داخوازا ئیران، ئیراق، ترکیێ و سووریێ دخوازیت قەوارەیا ھەرێما کوردستانێ تێک بدەت.
د گۆتارا خوە یا ب ناڤێ “ھەڤبەشیا پەکەکێ ل گەل عەشدا شەعبی ل ھەرێما کوردستانێ” دا دبێژیت پەکەکە ل گەل حەشدا شەعبی ھەول ددەت شەنگالێ ژ ھەرێما کوردستانێ دوور بێخیت و تەکەز دکەت کو پەکەکە ل سەر داخوازا ئیران، ئیراق، ترکیا و سووریێ تێکدانا قەوارەیا ھەرێما کوردستانێ کریە ئارمانج.
د گۆتارا خوە دا بەشیکچی دبێژیت:” حەشدا شەعبی رێخستنەکا نەیارێ کورد و کوردستانێ یە. داعش چییە، حەشدا شەعب ژی ھەمان تشتە. حەشدا شەعبی رێخستنەک نینە کو بالەک ھەبیت. ئەم دشێین بێژین د ناڤا حەشدا شەعبی دا چەند بال ھەنە. د ناڤا ھەموویان دا یەک ھەڤبەشی ھەیە و ھەموو ژی دژمنێن کورد و کوردستانێ نە.”
ھەروھا ئیسمایل بەشیکچی دبێژیت پەکەکە ھەڤبەشیێ ل گەل حەشدا شەعبی دکەت و ھەول ددەن قەوەرەیا ھەرێما کوردستانێ ژناڤ ببەن. بەشیکچی دبێژیت پەکەکێ د سالا 1980یێ دا سەربخوەبوونا ھەرێما کوردستانێ کرە ئارمانج لێ بەلێ نھا ل سەر داخوازا ئیران، ئیراق، ترکیا و سووریێ ھەول ددەت ستاتوویا ھەرێما کوردستانێ ژ ناڤ ببەت.
