هه‌رێما عه‌فرینێ یا رۆژئاڤا كوردستانێ د خه‌راتبرین ره‌وشا ئه‌وله‌هیێ دا ده‌رباس دبیت، د 24 ده‌مژمێرێن ده‌رباسبوویی دا كۆمێن چه‌كداران و میلیشیایێن گرێدایی تركیێ، هه‌ژماره‌كا جینایه‌تان لێ ئه‌نجام دانه.
ل گۆری نه‌رینگه‌ها سووری یا مافێن مرۆڤان، د ده‌ما 24 ده‌مژمێرێن ده‌رباسبوویی دا، چه‌ندین بوویه‌رێن نه‌خوه‌ش ل عه‌فرینێ و ناڤچه‌یێن وێ چێبوونه، كۆمێن چه‌كدارێن گرووپا سولتان موراد یا گرێدایی تركیێ، ل تاخا ئه‌شره‌فیێ یا عه‌فرینێ ب سه‌ر ماله‌كێ دا گرتنه و گوللـه به‌ردانه ژنه‌كێ و خوه‌ستن وێ و ژ مالا وێ ده‌رخن.
ده‌ست نیشان كر، د تۆلهلدانا ڤێ ژنێ دا، كه‌سه‌كێ مالباتا وێ ب ده‌مانجێ گوللـه به‌ردانه فه‌رمانداره‌كێ كۆما سولتان موراد و كوشت.
نه‌رینگه‌ها سووری ئه‌شكه‌ره كر، ل باژارۆكێ جۆلقان یێ گرێدای جندرێسێ، شێنیێن باژار و چه‌كدارێن گرووپا حه‌مزه یا گرێدای تركیێ، ب هه‌ڤ چوونه.
هه‌ر د ڤێ ده‌ربارێ دا، پۆلیسێن سه‌ربازی یێن گرێدای تركیێ، 3 شێنی ل نه‌خوه‌شخانه‌یا ئه‌عزازێ ده‌سته‌سه‌ر كرن كو د په‌ڤچوونێن ل گه‌ل كۆمێن چه‌كداران دا بریندار كه‌تبوون.
كۆمێن چه‌كدارێن گرێدای تركیێ، ئه‌ڤ ده‌ما 3 مه‌ها ب ئاوایه‌كی سیستماتیك ب سه‌ر مالێن خه‌لكی دا ل عه‌فرینێ دگرن و وان ته‌هدید دكه‌ن، ب ئامانجا وێ یه‌كێ وان ناچار بكه‌ن مالێن خوه ب جی بهێلن ژ بۆ كو گوهه‌رینا ده‌مۆگرافی ل ناڤچه‌یێ بێ كرن.
