پەکەکێ ل چەمانکێ خواست پرەکێ بتەقینیت

ئەڤرۆ سپێدێ، چەکدارێن سەر ب رێخستنا پەکەکێ ل چەمانکێ یا سەر ب ئامێدیێ ڤە دیسا خواست نەئارامیێ دروست بکەن، چەکدارێن پەکەکێ ل دەما دەرباسبوون ل سەر پرا “بارەمینکێ” بۆمبەیەک دانا و پشت را ئەو جیهـ بجی هشت.

چاڤکانیێن پگەها دارکا مازی ل باشوورێ کوردستان ئاشکەرا کر، ئیرۆ رۆژا سێ شەمی ل ساعەت 9ی سپێدێ، دەما چەکدارێن سەر ب رێخستنا پەکەکێ ل سەر پرا دوکەرێ کو خەلکێ ناڤچەیێ ب پرا “بارەمینکێ” ب ناڤ دکەن دەرباس بووی بۆمبەیەک ل سەر پرێ دانا و پاشان ئەو جیهـ بجی هشت.

چاڤکانیێن پێگەها دارکا مازی هەر وەها ئاشکەرا کر، پرا دوکەرێ دکەڤیتە باکورێ باژێرۆکێ چەمانکێ ب دووراتیا 2 کم، ئەڤ پرە نێزیکی 50 گوندێن ناڤچەیێ ب چەمانکێ ڤە گرێ ددەت و رۆژانە هەژمارەک هەری زێدە ژ خەلکی ل سەر وێ پرێ را دەرباس دبن.

هەر وەها هاتە زانین کو چەکدارێن پەکەکێ لەورا ئەڤ بۆمبە دانایە داکو رێ بهێتە قوت کرن و ئەو ب کەیفا دلێ خوە هاتن و چوونێ بکن، لێ بەلێ هەر د زوو دا هێزێن پێشمەرگەیێن کوردستانێ ئەڤ چەندە دیتیە و پلانا پەکەکێ و بۆمبە پووچ کرینە.

دهێتە زانین کو ئەڤە نە جارا یەکەمە ل چەمانکێ پەکەکە ب کارێن ب ڤی ئاوا رادبیت، ل 4ی مەها مژدارێ دا ژی پەکەکێ ئێریشی پێشمەرگەیێن پاراستنا دارستانێ کوردستانێ کر و پێشمەرگەیەک شەهید کر و 3یێن دی ژی بریندار کرن، پشت را ل ئێڤارا هەمان رۆژێ دا ئێریشێ پۆلیسێن نەفت و گازێ ل چەمانکێ کر، هەری داوی ژی ل شەڤا 14ێ کانوونێ، پەکەکێ ئێریشی خالەکا پشکنینێ یا پێشمەرگەیان ل ئامێدیێ کر و پێشمەرگەیەک شەھید کر.

هەر کو دچیت کارێن ئیستیفزازی یێن پەکەکێ ل دژی باشوورێ کوردستانێ زێدەتر دبن، ئەڤ چەندە ژی بوویە سەدەما نەرازیبوونا رایا گشتی د ناڤا هەرێما کوردستانێ دا و خەلک دخوازیت پەکەکە دەست ژ ڤان کارێن خوە بەردەت و چدی ل گۆر بەرژەوەندیێن دەولەتێن داگیرکەر تەڤ نەگەریت، هەر وەها گەل داخواز دکەت پەکەکە ژ هەرێما کوردستانێ دەرکەڤیت و خەباتا خوە دەرباسی باکورێ کوردستانێ بکەت و ل دژی ترکیێ شەری بکەت، نە کو رەوشا ئارام یا تاکە پەرچەیا کوردستانێ ژی تێک بدە.