دژه‌ ته‌رۆرا لاهۆر 15 كوردێن رۆژهه‌لات گرتن و 3 راده‌ستی ئیرانێ كرن

دژه‌ ته‌رۆرا لاهۆر 15 كوردێن رۆژهلات ده‌سته‌سه‌ركرن و 3 ژێ راده‌ستی ئیرانێ كرن

سازییا دژه‌ ته‌رۆرێ یا یه‌كێتییا نشتیمانییا كوردستانێ 15 كچ و كوڕێن كورد یێن رۆژهه‌لاتا كوردستانێ ده‌سته‌سه‌ر كرن كو ژ بۆ په‌یوه‌ندی كرنێ ب رێزێن پارتییه‌كا كوردستانی ب قاچاغی هاتبوونه‌ باشوورێ كوردستانێ، 3 ژێ سنۆرداش كرن و راده‌ستی ئیستخباراتا ئیرانێ كرن.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، هێزێن گرێدایی سازییا دژه‌ ته‌رۆرێ یا یه‌كێتییا نشتیمانی یا كوردستانێ كو ژ پال هه‌ڤسه‌رۆكێ یه‌نه‌كێ لاهۆرێ شێخ جه‌نگی و برایێ وی پۆلات شێخ جه‌نگی دهێته‌ برێڤه‌برن، 15 كه‌سێن كورد كو كچ و كۆرێن رۆژهلاتا كوردستانێ بوون، ل سنۆرێن باشوورێ كوردستانێ ده‌سته‌سه‌ر كرن.

ده‌ست نیشان كر، ئه‌ڤ 15 كه‌س ئه‌ندام و كادرێن رێخستنێن نهێنی یێن كۆمه‌لا شۆره‌شگه‌ر یا زه‌حمه‌تكێشێن كوردستانێ ب ناڤێ كۆمه‌لا موهته‌دی نه‌، ل مه‌هێن 8 و 9 یێن ئیسالێ وه‌ك گرووپ گرووپ ب رێكێن قاچاغ  ژ سنۆرێن هه‌ورامان و هه‌له‌بجه‌ روو كرنه‌ باشوورێ كوردستانێ، لێ به‌لێ ل سنۆران ژ پال هێزێن دژه‌ ته‌رۆرا یه‌نه‌كێ یا لاهۆر جه‌نگی هاتنه‌ ده‌سته‌سه‌ر كرن.

چاڤكانیێن پێگه‌ها مه‌ ئه‌شكه‌ره‌ كر، 3 كه‌س ژ ڤان كوردێن رۆژهلات هاتن سنۆرداش و راده‌ست كرن بۆ ئیرانێ و 12 كه‌س ژ بۆی گرتیگه‌هێن دژه‌ ته‌رۆرا لاهۆر جه‌نگی، هاتن ڤه‌گوهاستن.

كۆمه‌لا شۆره‌شگه‌ران ژ بۆ ئازاد كرنا ڤان گرتیێن خوه‌ ژ گرتیگه‌هێن دژه‌ ته‌رۆرا لاهۆر كه‌ته‌ ناڤا هه‌ولێن مه‌زن دا‌، لێ به‌لێ ئه‌ڤ هه‌ولێن وان هێژان بێ ئه‌نجام ماینه‌.

چاڤكانیێن پێگه‌ها داركا مازی هه‌روه‌ها خوه‌یا كر، ل 1 مه‌ها 10 یا ئیسالێ ژی، 4 كچێن دی یێن رۆژهلاتا كوردستانێ ب ناڤێن «نێرگز محه‌مه‌دی، بهار ئه‌حمه‌دی، نگین وه‌یسی و ئیلهام مورادی» ب رێكێن قاچاغ ژ ناڤچه‌یا ب ناڤێ باینگان یا گرێدای كرمانشانێ ده‌ركه‌تن، ئه‌و ب نیاز بوون بچنه‌ هه‌رێما باشوورێ كوردستانێ ژ بۆ كو په‌یوه‌ندیێ ب پارتییا حدكێ بكن، لێ به‌لێ ژ پال هێزێن ئیتلاعاتێ ڤه‌ ل سنۆران هاتن ده‌سته‌سه‌ر كرن.

ل گۆری زانیاریێن تایبه‌ت یێن پێگه‌ها مه‌، ئه‌ڤ چار كچه‌ ل سنۆرێ مه‌ریوانێ هاتبوون ده‌سته‌سه‌ر كرن، ئتیلاعاتێ ل ده‌ستپێكێ ئه‌و ڤه‌گوهاستنه‌ زیندانا كرمانشانێ و پشتره‌ ب 3 رۆژان ئانكو ل 4/10/2020ان ئه‌و ڤه‌گوهاستن گرتیگه‌هێن ته‌هرانێ.

پوستێن ھەمان بەش