رێخستنا په‌كه‌كێ ناسنامه‌یا دوو جوانێن رۆژئاڤا كوردستانێ ئه‌شكه‌ره كر كو ژ پال عه‌سكه‌رێن ترك ڤه ل باشوورێ كوردستانێ هاتنه كوشتن، رێخستنێ وه‌ك هه‌ر جار هه‌موو پێزانین ل ده‌ربارا وان به‌لاڤ كرنه، لێ ته‌مه‌نا وان ئه‌شكه‌ره نه‌كرییه ژ بۆ كو جینایه‌تا چه‌كدار كرنا زارۆكان ل سه‌ر ته‌سبیت نه‌بیت.
هه‌په‌گێ ئیرۆ رۆژا شه‌مبی 26/12/2020ێ د به‌یانه‌كا نڤیسكی دا ئه‌شكه‌ره كر كو دوو گه‌ریلایێن وان ب ناڤێ «ئۆرهان محه‌مه‌د و سه‌لوا شێخ محه‌مه‌د» كو ژ خه‌لكێ باژارێن كۆبانی و عه‌فرینێ یێن رۆژئاڤا كوردستانێ نه، د ئێریشه‌كا ئاسمانی یا ده‌وله‌تا تركیێ دا ل 19 جۆتمه‌هێ ل بۆسه‌لێ یا ناڤچه‌یا حه‌فته‌نینێ ل باشوورێ كوردستانێ هاتنه كوشتن.
هه‌په‌گێ وه‌كه هه‌رجار ده‌م و جهێ كو ئێریشا ئه‌ڤ جوانه تێدا هاتنه هه‌ده‌ف كرن ئه‌شكه‌ر كر، لێ به‌لێ چ ئاماژه ب ته‌مه‌نا وان نه‌كرییه، ژ بۆ كو تاوانا ره‌ڤاندن و ب كوشتن دانا سنێله و جوانێن كورد ل سه‌ر ته‌سبیت نه‌بیت.
رێخستنا په‌كه‌كێ، ژ ده‌ستپێكا دامه‌زراندنا خوه پشت به‌ستنێ ل سه‌ر ره‌ڤاندنا زارۆ و سنێله‌یێن كورد ژ هه‌ر چار په‌رچه‌یێن كوردستانی دكه‌ت و ئه‌ڤ یه‌ك دبیته ژێده‌را سه‌ره‌كی یا رێخستنێ ژ بۆ چێكرنا شه‌رڤانان، په‌كه‌كه وان سنێله‌یان ب ده‌ستێ عه‌سكه‌رێن ترك ب كوشتن دده‌ت.
