میلیشا عه‌سائب ئه‌هلولحه‌ق یا شیعه ل ئیراقێ ئیرۆ راگهاند كو ئه‌و ئالیێ گه‌فان ل مسته‌فا كازمی یێ سه‌رۆك وه‌زیر دكه‌ت، په‌یوه‌ندییا وان پێڤه نینه.
میلیشا ئه‌هلولحه‌ق ئیرۆ رۆژا شه‌مبی 26/12/2020ێ د به‌یانه‌كا نڤیسكی دا ئه‌شكه‌ره كر، ئالیێ كو سه‌رۆك وه‌زیر مسته‌فا كازمی ب سزادانێ ته‌هدید كری هه‌گه‌ر ئێریشا رێبه‌رێ وان قه‌یس خه‌زعه‌لی كر، چ په‌یوه‌ندییا گرووپا وان یا چه‌كداری پێڤه نینه.
ژ دوهی رۆژا ئینی، د سۆسیال مه‌دیایێ دا داخویانییه‌ك و هنده‌ك دیمه‌نێن ڤیدیۆیی یێن میلیشیا ئه‌هلولحه‌ق به‌لاڤ بوو و تێدا مسته‌فا كازمی هاتییه ته‌هدید كرن كو هه‌گه‌ر كازمی ئێریشا قه‌یس خه‌زعلی یێ شێخێ وان بكه‌ت، دێ هێته سزادان.
ئه‌ڤ داخویانییا گه‌ف كرنێ ل سه‌ر ناڤێ نه‌عیم عه‌بوودی یێ په‌یڤدارێ میلیشیا ئه‌هلوحه‌ق هات به‌لاڤ كرن كو گۆتبوو: ئه‌و ژ بۆ پاراستنا رومه‌تا ئیراقێ ته‌ڤ دگه‌رن و هه‌گه‌ر كازمی ئێریشا شێخێ مه یێ خه‌زعه‌لی بكه‌ت، ئه‌م دێ وی سزا ده‌ن.
ڤێ داخویانییا میلیشیا ئه‌هلولحه‌ق كارڤه‌دان ل په‌ی هاتن، له‌وما ئیرۆ وێ گرووپا چه‌كدار داخویانییه‌ك نڤیسكی پارڤه كر و گۆت كو ته‌هدید كرنا كازمی ژ پال وان ڤه نه‌هاتییه كرن.
