فەردا چەتین، یەک ژ کادرۆیێن پەکەکێ و بەرپرسێ شەبەکا چاپەمەنیا ئەورۆپا یا ڤێ حیزبێ یە، د 24ێ کانوونێ دا ئۆزگۆر پۆلیتیکا دا گۆتارەک بەلاڤکر. ئەڤ گۆتارە د ئاژانسا ب ناڤێ ANF دا ژی ھاتە بەلاڤکرن.

ب راستی، ئەڤ گۆتارە نە گەف و سڤکاتی پێکرنا یەکەمە کو پشتی نڤیسینا داوی یا مامۆستا ئیسماعیل بێشیکچی ل وی ھاتیە کرن. ل سەر مەدیایا جڤاکی ژ ئالیێ چالاکڤان و فەیسبووکچیێن پەکەکێ ڤە گەلەک گۆتنێن شەرمەزاری و کرێت ل مامۆستا ھاتنە کرن. وەکی دن، ل سەر مالپەرا ئاھڤال بەرسڤەک ژ بۆ مامۆستا بەشیکچی ھاتە وەشاندن.

مامۆستا بێشیکچی گاڤێن ستراتەژیک و تاکتیکییێن پەکەکێ کەشف کرن

د دەمەکێ دا کو پەکەکێ دخواست رێکەفتنا خوە یا ل لگەل حەشدا شەعبی، ئەنیا شیعا، و خیانەتا ل شنگالێ ل حکوومەتا ھەرێما کوردستانێ ب گشتی کری ڤەشێریت و رۆژەڤێ بگوهریت، ئێریشەکا ب ڤی رەنگی یا ل دژی مامۆستا بێشیکچی ب راستی دھاتە چاڤەرێکرن. ژ بەر کو مامۆستا بێشکچی گاڤێن ستراتەژیک و تاکتیکی یێن پەکەکێ کو دخوازیت د بەردێلا ستاتویا کوردی یا رەوا دا ب بکارئانینا ناکۆکیێن د ناڤبەرا ئیراق و حکوومەتا ھەرێما کوردستانێ دا بەرژەوەندیێن پارتیا خوە گارانتی بکەت کەشف کرن.

نڤیسکار و وەلاتپارێزێن کورد پەیوەندی یێن پەکەکێ و حەشدا شەعبی یێن دژی حکوومەتا ھەرێما کوردستانێ قاسی دھاتە خواستن کەشف نەکرن و دەنگێ خوە بلند نەکرن. ئەڤ یەک ژی ژ بۆ فەردا چەتین و گرووپا وی بو فرسەتەک کو بێرێزییێ ب مامۆستا بێشیکچی بکەن.

نڤیسا فەردا چەتن نە گۆتارە ئەو داخویانیەکا گەف و تەھدیدێ یە کو ل سەر ناڤێ پەکەکێ ھاتیە نڤیساندن

ب راستی، ئەم دزانین کو نڤیسا  فەردا چەتین نە مەقالەیە. ئەو داخویانیەکا گەف و تەھدیدێ یە کو ل سەر ناڤێ پەکەکێ ھاتیە نڤیساندن. د سالا 2010ێ دا، پەکەکێ دو گۆتار ژ لایێ دوران کالکان ڤە ب ناڤێ عادل کورتای و قاسم ئەنگن (یێ کو سالا بۆری مری) نڤیساندبوو و تێدا گەفێن تووند ل مامۆستا بێشیکچی ھات بوون کرن. ئەڤ نڤیسە کو تێدا گەف ل بێشیکچی ھاتبوون کرن د مالپەرا ھەپەگێ دا ھاتبوو وەشاندن. گەلەک رەوشەنبیر و نڤیسکاران بەرتەک نیشانی ڤێ رەوشێ دان و ئیمزا ھاتبوون کۆمکرن. ھەپەگە نەچار ما کو پاشێ ڤان ھەر دو نڤیسان ژ مالپەرێن خوە راکەت. ژ بەر ڤێ سەدەمێ، پەکەکە نها ژ بۆ گەفکرن ل مامۆستا بێشیکچی نڤیسکارێن نەناس بکار تینیت.

لێبەلێ، یا کو فەردا چەتین نڤیساندی دهێتە واتەیا وێ کو موستەفا قاراسو و جەمیل بایک نڤیساندیە. مەدیایا پەکەکێ پێنووسا خوە ل سەر ھیەرارشی  (سیستەما کو تێدا کەس یان تشت خوەدی پلەیێن جودا و دیارکری نە) و یەکدەنگی یا ووسا ھشک رێخستن کریە. چاپەمەنیا پەکەکێ ب تەنێ ژ بۆ کو پرۆپاگاندایا خوە بکەت نەھاتییە ئاڤاکرن. چاپەمەنیا پەکەکێ ژ بۆ کو خوە ل گۆری ھەر زرۆف و ھەر تشتەکی بگوھەزینیت (تەعدیل) بکەت ھاتیە چێکرن. گەلەک میناکێن دیرۆکی ھەنە کو شاهدەئیێ ل سەر ڤێ مژارێ بدەن.

رەوشەکا وسا ھەیە کو فاشیزما ترک ناھێلی فاشیزما پەکەکێ بهێتە کەشف کرن

زانا ئازاد، یەک ژ نڤیسکارێن پەکەکێ، بەشداری نووچێن MED TV  ببوو و ل وێرێ گەف ل تاھر ئەلچ و ئالتان تان کرن و گۆت “یێ کو ل دژی بەرخوەدانێ (پەکەکێ) پەیڤەکێ دبێژیت، مافێ وی نینە کو ل کوردستانێ بژیت. ” ئەو گەف هێژان ژی د بیرا کوردان دایە. تەنێ 12 رۆژ پشتی ئاخافتنا زانا ئازادی، تاھر ئەلچی ل سووریێ ب رەنگەک بالکێش ھاتە کوشتن. حەتا رەوشەک ووسا ھەیە کو فاشیزما ترک ناھێلیت فاشیزما پەکەکێ بهێتە کەشف کرن.

فەردا چەتین ھەول ددەت کو ھەمان تشتی بکەت. فەردا چەتین ل سەر گۆتنێن مامۆستا بێشیکچی: ” پێویستە پەکەکە ژ بۆ ناسکرنا حکوومەتا ھەرێما کوردستانێ بهێتە داخوازکرن گەر پەکەکە حکوومەتا ھەرێمێ ناس نەکەت پێویستە ژ ئاخا ھەرێمێ دەربکەڤیت” دبێژیت دەولەتا ترک و مامۆستە بێشیکچی وەکو ھەڤ دفکرن. ئیسماعیل بێشیکچی ژ سالا 1965ێ هێڤە ل دژی دەولەتا ترک مافێ خوەرێڤەبرنێ یێ گەلێ کورد دپارێزیت. ئیسماعیل بێشیکچی بال کێشا سەر وێ یەکێ کو کوردستان پێش پەکەکێ ژی بندەست بوو. ژ بۆ ئیسماعیل بێشیکچی، د 1971ێ دا ل دادگەھا لەشکەری یا دیاربەکرێ کاربدەستەکێ لەشکەری گۆت، “د دەما دادگەھکرنا مامۆستا دا، ئەفسەرەک لەشکەری گۆت،” ڤی کەسی دینامیت (تێنتی) خستیە بنیاتێ دەولەتێ. ” ڤێجا ئیسماعیل بێشیکچی یێ فەردا چەتین باس دکەت کەسەک بڤی رەنگی یە.

ما پەکەکە سازیەکا پیرۆزە کو ژ بحەشتێ ھاتیە جیھانێ و رەخنەگرتن یان ئاخافتن ل سەر وێ قەدەخەیە

فەردا چەتین و چالاکڤانێن پەکەکێ نە ئەو کەسن کو بشێن ئیسماعیل بێشیکچی تاوانبار بکەن و سنۆرێ ئاخفتنێن وی دیار بکەن. کی ڤی مافی ددەتە وان؟ پەکەکە وێ وێرەکیێ ژ کووڤە دئینیت کو ببێژیت، راوەستن، نەئاخڤن، ھوون نەحەقن، ھوون بێدەنگ نابن؟ یان فەردا چەتین و چەتێن وی ما کارمەندێن زابتا نە؟ یان ژی ما پەکەکە سازیەکا پیرۆزە کو ژ بحەشتێ ھاتیە جیھانێ و ل سەر وێ رەخنە گرتن یان ئاخافتن قەدەغەیە، گەلۆ فەردا چەتین و رووسپیێن وی، ڤی ئەمرێ خوەدایی بجیھ تینن؟

فەردا چەتین کەسەکێ ئەوقاس بێ عارە،  دبێژیت ئیسماعیل بێشیکچی ژ پەدەکێ پارا وەردگریت لەوما رەخنەیان ل پەکەکێ دگریت. مرۆڤەک تەنێ دکاریت ئەوقاس رەزیل ببیت. ب ھەزاران مرۆڤێن کو دبینن مامۆستا بێشیکچی ل جادەیا مەشوتیەتا ستەنبۆلێ ل بەندا پاسێ یە. بێشیکچی نە خوەدیێ چ سەرمایەیێ یە، ژ هیچ کەسەکی فلسەک پارە نە وەرگرتییە. مامۆستا بێشیکچی چ جارا وەکو ژییانا هایلایڤ یا فەردا چەتین ل بەلچیکا نە ژییایە.

ئیسمایل بێشیکچی د ناڤبەرا سالێن 1980-1999ێ دا خزمەتەکا مەزن ژ بۆ پەکەکێ کربوو

فەردا چەتین ژی ئیسماعیل بێشیکچی تاوانبار دکەت کو ژ بۆ ئازادیا ئۆجالان یەک پەیڤ ژی نەگۆتیە. راستیا کو عەبدلا ئۆجەلان گۆت “دایکا من ترکە، ھەکە خزمەتەک ژ دەستێ من بهێت ئەز دێ کەم” و ل دادگەھێ لێبۆرین ژ دەولەتا ترک خواست، و بازرگانیا وی یا ل گەل دەولەتا ترک و نە هەلبژارتنا رێیا بەرخوەدانێ نە تەنێ ژ بۆ بێشیکچی، ژ بۆ گەلەک کەسان بوو خالا شکەستنا ئاپۆ. ئیسماعیل بێشیکچی د ناڤبەرا سالێن 1980-1999ێ خزمەتەک مەزن ژ بۆ پەکەکێ کربوو. لێ وی قەبولنەکر کو ئاپۆ بکەڤیتە رەوشەکا ئەوقاس کەتی، بەرامبەری دەولەتا ترک. بێشیکچی پێنج سالا ژ ژییانێ سلبوو، یەک گۆتار نەنڤیسی، ل یەک جیھ نەپەیڤی و یەک رەخنە ژی نەگرت. پشتی پێنج سالان، وی گۆت، “پاراستنا مافێ چارەنڤیسێ کوردان، دەینەکێ روومەتێ یە”. ئەو ئاخفت و گۆت کو دڤێت ئێدی ئۆجەلان بێدەنگ بمینیت. وی گۆت، “گرتیەک د دەستێ دوژمن دا مافێ وی نینە کو چارەنڤیسا گەلێ کورد دیار بکەت.”

فەردا چەتین ژ بۆ کو مامۆستا بێشیکچی بەیعەت ب ئۆجەلان و پەکەکێ نەدایە گەلەک ھێرس بوویە. بێشیکچی کەسەکی زانا و خوەدی مەبدەئێن ئەخلاقی و فکری یە. دژی داگیرکەرییا دەولەتا ترک مافێ دەولەتبوونا کوردان د دادگەھێدا پاراست و 17 سالان ھاتە زیندانیکرن. مامۆستایێ زانکۆیێ بوو ژ وێرێ ھاتە دەرکرن. ھەموو دەرگەھ ژ وی ھاتنە گرتن لێ دیسا وی دەست ژ راستی پاراستنێ بەرنە دا. ڤێجا ئەڤ کەسە دێ چاوە بیتە ئاپۆچی ؟ گەلۆ ما ھوون ژ ئەسمانا ھاتینە!

ھوون دکارن نیقاشێ ل گەل بێشیکچی بکەن، ھوون رەخنەیان ل وی بگرن، دبیت کو ھوون رامانێن وی قەبوول نەکەن، لێ ھوون نکارن عەیارێ بدنە ئیسماعیل بێشیکچی

نە پێویستە ئەم گەلەک درێژ بکەین. دبیت کو فەردا چەتین کۆمیسەرێ سییاسی یێ پەکەکێ بیت، لێ ئەو تەنێ دکارەیت ڤێ یەکێ د ناڤ پەکەکێ دا بکەت. تەنێ ئەو دکاریت کارمەندێن خوە سەرەراست بکەت.

بەشیکچی د نڤیسا خوە دا باس ل خالێن گەلەک گرنگ کربوو و دگۆت، ل شنگالێ، یێ کو جلکێن حەشدا شەعبی ل خوە کری، نە یەبەشە یە بەلکو پەکەکە یە. تێکەلیێن پەکەکێ ل گەل حەشدا شەعبی زیانێ دگەهینیتە دەستکەفتێن مەشرووع یێن گەلێ کورد ئانکو حکوومەتا ھەرێما کوردستانێ. ھەر کەس دزانیت کو پەکەکە ئەوقاس د سیاسەتێ دا نە ئەحمەقە  کو بێژیت ئەز دخوازم حکوومەتا ھەرێما کوردستانێ ھەلوەشینم.

ھوون دکارن نیقاشێ ل گەل بێشیکچی دا بکەن، ھوون رەخنەیان ل وی بگرن، دبیت کو ھوون رامانێن وی قەبوول نەکەن، لێ ھوون بکارن عەیارێ بدنە ئیسماعیل بێشیکچی. دەولەتا ترک کو دخواست عەیارێ بدەتە مامۆستا ئیسماعیل بێشیکچی لێ وی ئەو یەک قەبوول نەکر و ئەڤە 55 سالن سەرێ خوە ل ھەمبەر دەولەتێ نەچەماند، 17 سالان د گرتیگەھێ دا ما و نێزیکێ 40 پەرتووکا بەلاڤکرن. وەکی کو خالد سادن ل سەر بێشیکچی گۆتی، “ھەکە ل ڤی وەلاتی دو کەس ھەبن کو نەبنە زلامێ کەسەکێ دی، یێ یەکەم در ئیسماعیل بێشیکچی یە”. گەلێ کورد بێشیکچی باش ناس دکەت، ژ بەر ڤێ یەکێ داخویانیا فەردا چەتین ل سەر ناڤێ پەکەکێ نڤیساندی کو گەف ل ئیسماعیل بێشیکچی کری ژ لایێ وەلاتپارێزێن کوردستانێ و مرۆڤێن حەقیقەت پەرەس ڤە ھاتییە رەد کرن.