د ڤێ ھەڤپەیڤینێ دا، کو ئیرۆ رۆژا یەکشەمی 27/12/2020ێ د مالپەرا KDP.Info دە هاتیە پارڤە کرن عۆسمان بایدەمیر بەحسا چەند مژاران دکەت و نەرینا خوە ل سەر چەند پرسان ددە خوەیاکرن.
بایدەمیر نەرینا خوە ل سەر رەوشا سیاسی یا نها یا کوردان ئانی زمان و راگهاند: ” گەرەکە ئەم لھەڤ گوھداری بکەین. ئەز باوەرم ھەر دەما کو ئەم لھەڤ گوھدار بکەین و کار بکەینن، دێ %50 ژ کێشەیێن مە چارەسەر بن، یا مایی ژی ب دانوستاندنان چارەسەر دبیت. ئەم د وێ باوەریێ دا نە کو هیچ پرسگرێکەک مەزن د ناڤبەرا پارتیێن سیاسی یێن کوردی دا نینە. تشتا کو ھەیە ئەوە کو گوهداریا هەڤدو ناکەن و ھەڤدو قەبوول ناکەن. گەرەکە گوھداراریا هەڤ بکەن و دانوستاندنان بکەن”.
ل سەر پرسا رۆژئاڤایێ کوردستانێ و دیالۆگا کوردی-کوردی کو ل سەر بنگەھا رێکەفتنا دوھۆکێ هاتینە دەستپێکرن، بایدەمیر نەرینا خوە دا دیارکرن و راگهاند، “ئاڤ و نان و ئۆکسجین ژ بۆ مرۆڤان چەند گرینگ بن، ئەوقاسی دانوستاندن و دیالۆگێن کوردی – کوردی ل رۆژئاڤایێ کوردستانێ گرینگ. نان، چەند پیرۆز بیت، لھەڤکرن و دانوستاندن ژ بۆ گەلێ کورد ئەقاسی پیرۆزن. ئەو رێکەفتن میناکەکا خویایە ژ بۆ ھەموو پارتیێن کوردی و تەڤاھیا پارچەیێن کوردستانێ، لەوما ئەز وەک کوردەکی سپاسیا وان دکم و پشتەڤانی و دلخوەشیا خوە نیشان ددەم ژ بۆ وی کاری، نەخاسمە ژ بۆ کەدا سەرۆکێ ھەرێما کوردستانێ نێچیرڤان بارزانی کو پشتەڤانێ سەرەکی یە ژ بۆ ڤێ لهەڤکرنێ.”
بایدەمیر ئاشکەرا کر کو ھەموو وەلاتێن ناڤچەیێ ناخوازن ئەو پێڤاژۆ سەر بکەڤیت و لھەڤکرنەکا کوردی – کوردی چێببیت. وی گۆت، گەرەکە کوردا ھا ژ پلان و لیستکێن وان دەولەتان ھەبن. ئەو ناخوازن کورد یەک بن. گەرەکە کورد ژ سەر مێزا دانوستاندنان رانەبن ھەیا کو ستراتیژیەکا ھەڤبەش و مزگینیەک ژ بۆ ئاشتیا ناڤخوە بەلاڤ نەکەن. دڤێت ئەڤ پێڤاژۆیە ببیتە ئارمانجەکا پیرۆز ژ بۆ تەڤاھیا گەلێ کوردستانێ.
ل سەر مژارا رۆلا مەسعوود بارزانی ژ بۆی ل هەڤ نێزیک کرنا کوردێن رۆژئاڤا ب تایبەتی پشتی دەستپێکرنا شۆرەشا سووریێ بایدەمیر گۆت: ” ب راستی ھندەک کەس و کەسایەتی ل ھەرچار پارچەیێن کوردستانێ هەنە کو ئەم دکارن ببێژین بێ وان ت پرۆسەیەکا ئاشتیێ بسەر ناکەڤیت. رۆلا سەرۆکێ ھەرێما کوردستانێ رۆلەک سەرەکی یە و ئەز باوەرم کو بێ وی ئەڤ پێڤاژۆ بسەر ناکەڤیت. دڤێت ئەو پێڤاژۆ بەردەوام بیت و ئەم پشتەڤانیا وێ بکەین. ئەو پێڤاژۆ ژ بۆ یەکیتیێ ژ بۆ 40 ملیۆن کوردا گرینگە و ھێڤیێن گەلێ کورد مەزنتر دکەن.
بایدەمیر نەرینا خوە ل سەر شەرێ کوردان ل دژی داعشێ ب ڤی ئاوا دا دیارکرن و راگهاند، ھەموو خەبات و فیداکاریا کوردان ل ھەرچار پارچەیێن کوردستانێ ژ بۆ تشتەکی یە، ئەو ژی ئازادیا کوردستانێ یە. شەرێ داعشێ ژی ژ بۆ ھەمان مەبەستێ بوو. کوردان د شەرێ ل دژی داعشێ دا 2 تشتێن مەزن بدەست خستن. وەلاتێ خوە پاراستن و یا دویەم ژی ھەموو جیھانێ پشتراست کرن کو کورد دۆستێ پێشکەفتن و دەمۆکراسی و وەکھەڤیێ نە. نە دوژمنێ مرۆڤاتیێ نە و ئەم ل دژی تەرۆرێ نە. ب راستی ئەڤە ژی سەرکەفتنەکا مەزن بوو ژ بۆ ھەموو کوردان، کو ھەموو ملەتێن جیھانێ کوردان باشتر ناس بکەن. ئەم زانین کو وەلاتێن جیھانێ ژ بۆ بەرژەوەندیێن خوە کار دکەن، لەوما دڤێت ئەم کورد ژی ل بەرژەوەندیێن خوە بگەرین. د سەری دا دڤێت ئەم یەک بین. دڤێت ئەم وێ یەکێ فام بکەین کو ل رۆژھلاتا ناڤین تەنێ ھەبوونا مەدەنیەتێ ل کوردان دهێت و هیچ ملەتەک ل رۆژھلاتا ناڤین ژبلی کوردان نینە کو وەلاتێن جیھانێ پەیوەندیێن مەدەنی لگەل ئاڤا بکەن.
ل داویێ بایدەمیر راگهاند، مە گەلەک قوربانی دانە، لێ ژ ھەرتشتی گرنگتر ئەوە، کا ئەمێ چاوا ڤان دەستکەفتێن خوە بپارێزن و چاوا وەکو چاڤێ خوە مە دێ ھا ژ وان ھەبیت. ھەر دەستکەفتەکا کوردان ل ھەر چار پارچەیێن کوردستانێ دەستکەفتا 40 ملیۆن کوردا یە. دڤێت ھەموو وەلات ب ئاشتی کار ل گەل کوردان بکەن. ژ بۆ ئاشتیا رۆژھلاتا ناڤین دڤێت پرسا کوردی بهێتە چارەسەرکرن. کورد ل سەر هیچ کەسەکێ نە گەفن. بەرێ خوە بدەنە پێکھاتەیێن باشوور و رۆژئاڤایێ کوردستانێ، کو چاوا پێکھاتەیێن ئۆلی و نەتەوی ل کوردستانێ د ناڤەند و پارلەمانتۆیا کوردستانێ دا خوەدی نوونەرن. ئەڤ یەکە نیشان ددەت کو کورد نوونەر و بالیۆزێن ئاشتیێ نە ل رۆژھلاتا ناڤین.
