رژێما ئیسلامی یا ئیرانێ، ل باژارێ سنە یێ رۆژھه‌لاتێ کوردستانێ، ژنەکا کورد ب دار ڤە کر.
ل گۆر مالپەرا مافێن مرۆڤان یا ھەنگاوێ دایە زانین، دوھی رۆژا یه‌كشه‌می د گرتیگەھا ناڤەندییا باژارێ سنە دا، گرتییا کورد «زەینەب خودامورادی» یا 42 سالی کو خه‌لكا باژارۆکێ قوروە یێ رۆژھلاتێ کوردستانێ بوو، ھات سێداره دان.
ژنا کورد 5 سال بەرێ ب تۆھمەتا کوشتنا دوو زارۆکان ھاتبوو گرتن و ب سێداره‌دانێ ھاتبوو مەحکوم کرن.
زەینەب خودامورادی د ھاڤینا سالا 2015ێ دا، ب تۆھمەتا کوشتنا زارۆکێ خوە یێ ساڤا یێ ب ناڤێ «محه‌مه‌د جەواد» و کەچا زلامێ خۆ «کەچک ژ ژنەکا دن بوویە» ب ناڤێ ھەدیس یا 7 سالی ھاتبوو گرتن و ب سێداره‌دانێ ھاتبوو مەحکوم کرن.
وێ ژنا کورد ھەول دابوو خوە ژی بکوژیت، لێ ڤێ هه‌ولا وێ سه‌رنه‌گرتبوو.
تێ زانین، ته‌نێ د سه‌رده‌ما ده‌ستهلاتا حه‌سه‌ن رۆحانی دا، پێتری 100 ژنان ل ئیرانێ ب سێداره دانێ هاتینه جه‌زا كرن.
