چەکدارێن ئۆپۆزسیۆنا سووریێ یێن ترکیە پشتەڤانییا وان دکەت، ب رەڤاندن و ئەشکەنجەدانا وەلاتیێن کوردێن عه‌فرینێ بەردەوامن.
چەکدارێن ئۆپۆزیسیۆنا سووریێ یێن ترکیە پشتەڤانیا وان دکە، ب ئارمانجا ستاندنا فدیێ، 2 کەس ژ گوندەکێ عه‌فرینێ رەڤاندن كو برایێن هه‌ڤن.
رێخستنا مافێن مرۆڤان ل عه‌فرینێ بەلاڤ کر، چەکدارێن میلیشیا سولتان سلێمان ل رۆژا 24ێ ڤێ مەھێ دوو برا ب ناڤێ «نەشئەت و سدقی حاج ئیبراھیم شێخۆ» ژ ناڤچەیا شیێ رەڤاندن.
وێ رێخستنا مافێن مرۆڤان دەربارێ سەدەما رەڤاندنێ دیار کر، چەکداران بھانە گرتن کو وان ھەردوو برایان بێی کو وان ئاگاھدار بکه‌ن، دارێن زەیتوونێ یێن خوشکێن خوە یێن ل دەرڤەیی گوندی چنینە.
رێخستنا مافێن مرۆڤان دیار کر، ئەو ھەردوو برا راستی ئەشکەنجەیێن ھۆڤانە ھاتنە، ھەروه‌ھا چەکداران فدیا 800 دۆلارێن ئه‌مەریکی ل سه‌ر هه‌ریەک ژ وان سەپاندنە.
ئەڤ د دەمەکێ دا یه، ل حه‌فتییا رابووری چەکدارێن گرووپا جەبھە ئەل-شامیێ باژارۆکێ مابەتا خستبوو دۆرپێچەکا توند، ل وەلاتیێن سڤیل ددان و زێدەتر ژ 60 وەلاتیێن سڤیل ژی رەڤاندبوون.
