ئاژانسا فەرمی یا رووسیایێ سپوتنیکێ ئیدیعا کر کو ھێزێن سووریا دەمۆکراتیک (ھەسەدە) رازی بوویە باژارۆکێ عەین عیسا یێ رۆژئاڤایێ کوردستانێ رادەستی ھێزێن رەژیما سووریێ و رووسیایێ بکەت.
ل گۆری ئاژانسێ کو نووچەیا خوە ژ زاردەڤێ بەرپرسەکێ حکوومەتا سووریێ یێ ب ناڤێ عومەر رەحموون ڤەگوهاستیە، دۆھی 27ێ کانوونا 2020ێ، د ناڤبەرا بەرپرسێن ھەسەدێ، رەژیما سووریێ و رووسیایێ دا جڤینەک ل سەر رەوشا عەین عیسایێ پێک ھاتیە و د جڤینێ دا ھەسەدە رازی بوویە ژ عەین عیسا دەرکەڤیت و رادەستی ھێزێن رەژیما سووریێ بکەت.
ھەمان چاڤکانیێ گۆتیە، ھەسەدە دێ د ناڤ چەند دەمژمێرێن داهاتی دا ژ عەین عیسا دەرکەڤیت.
ھێژایی گۆتنێ یە، حەفتەیا بۆری بەرپرسێن ھەسەدێ راگھاندبوون کو وان رەد کریە عەین عیسایێ رادەست بکن و ئەو دێ ل ھەمبەرێ ئێریش و گەفێن ترکیێ خوە بپارێزن.
ل سەر ڤێ ئیدیعایا ئاژانسا رووسی هێژان ژ ئالیێ ھەسەدێ ڤە چ داخویانیەک نەھاتیە دایین.
