سەرۆکێ بارۆیا شرنەخێ دەربارا دۆسیەیا کۆمکوژیا رۆبۆسکێ بەرسڤا پەرڤین بولدان دا و گۆت، “خەمسارییا کۆمسییۆنا یاسایی یا ھەدەپێ یە. مخابن پەرڤین بولدان ھەڤالێن خوە یێن سیاسەتمەدار پاراستنە و تۆپ ئاڤێتیە ئالیێ مە.”
پشتی کو ھەڤسەرۆکا گشتی یا ھەدەپێ په‌رڤین بولدان د ده‌ربارا کومکوژیا رۆبۆسکی ل 9ەمین سالڤەگەرا ڤێ کومکوژیێ دە داخویانی دای و بارۆیا شرنه‌خێ ب کەمترخەم دای خوەیاکرن و راگهاندی ژ ئەگەرێ خه‌مساریا بارۆیا شرنه‌خێ د ڤێ دوسیەیێ دا دادپەروەریێ جھێ خوە نەگرتیە سەرۆکێ بارۆیا شرنەخێ نوشێرڤان ئەلچی، بەرسڤا بوولدانێ ددەت و وێ وەکە دەرەوین دیار دکەت.
سه‌رۆکێ بارۆیا شرنه‌خێ، نوشێرڤان ئه‌لچی، به‌رسڤا داخویانیا پەرڤین بوولدانێ دا و ده‌ره‌وا وێ ئا‌شکه‌راکر. ئه‌لچی دبێژیت کو نە بارۆیا شەرنەخێ بەلکو هەدەپێ ب خوە دۆسیەیا ڕۆبۆسکێ نه‌شۆپاند و ئه‌و بوون سەدەما ڕه‌دکرنا دۆسیەیا ڕۆبۆسکێ ل دادگه‌ها مافێ مرۆڤان یا ئه‌ورۆپایێ دا.
ئەلچی ھەروھا گۆت، “پشتی کو دۆسیە بۆ دۆزگەریا لەشکەری یا ئەنقەرێ ھاتیە شاندن، ژ وێ دەمێ ڤە دۆسیە د بن کۆنترۆلا یاساناس و پارێزەرێن ھەدەپێ دا بوو” و ئاشکەرا دکەت کو وان ھەموو پرۆسەیا ھقووقی یا وێ دۆسیەیێ شۆپاندنە.
د دەما گۆتنێن خوە دا ئەلچی دەربارێ بێدەنگیا بارۆیا وان دا دبێژیت، “مە نەخواست ل سەر ئێشا ڤان مالباتان سیاسەتێ بکەین. لێ مخابن ئیرۆ ئەم دبینن کو ل سەر ڤێ ئێشێ سیاسەتێ دکەن، ئەڤ ژی خەلەتە.”
ژ ئالیێ خوە ڤە حەسیب کاپلان، پەرلەمانتەرێ بەرێ یێ ھەدەپێ یێ شرنەخێ، ئاشکەرا کربوو کو ب ناڤبەینکاریا سەلاحەدین دەمیرتاش مالباتێن رۆبۆسکێ ل گەل رەجەپ تەییب ئەردۆگان کو سەرۆکوەزیرێ وێ دەمێ بوو جڤیان. ئەلچی ل سەر ڤێ مژارێ ژی دبێژیت، “ژ بۆ ڤەکرنا بالافرخانەیا شەرفەدین ئەلچی ل وێرێ بوون. لێ نە حەسیب کاپلان و نە یێن ل وێ دەرێ، چ زانیاریەک نەدان مە. ئەم د جڤینێ دا ئامادە نەبوون، ئەم نزانین ئاخافتن ل سەر چ ھاتیە کرن.”
