ئارتێشا ترکیێ ل ناڤچەیا بەرێ گارێ ئێریشی پەکەکێ کر

باله‌فرێن ده‌وله‌تا تركیێ ئیرۆ دو جاران چەکدارێن رێخستنا په‌كه‌كێ ل ناڤچەیا بەرێ گارێ یا سەر ب قەزا ئامێدیێ ڤە هەدەف كرن.

چاڤكانیێن پێگه‌ها داركا مازی ل ئامێدیێ ئا‌شكه‌را كرن، ئیرۆ رۆژا یەکشەمی 3/1/2021ێ، باله‌فرێن ده‌وله‌تا تركیێ، 2 جاران چەکدارێن پەکەکێ ل چیایێ گارە هەدەف کرن.

ده‌ست نیشان كر، ئیرۆ پشتی نیڤرۆ بالەفرێن شەری یێن دەولەتا ترکیێ ل دەمژمێر2:10 خۆلەک ناڤچەیێن «سەرێ چیایێ بێسمتێ و سەرێ شکێرا کەزانکێ» ل ناڤچەیا بەرێ گارێ بۆمبەباران کرن.

ل گۆر وێنەیێن بۆمبەبارانێ کو ژ لایێ چاڤکانیێن پێگەها مە ل باشوورێ کوردستانێ ژ بۆ مە هاتینە شاندن ئاشکەرا دبیت کو جیهێن هاتیە بۆمبەباران کرن عەمبارێن چەکدارێن رێخستنا پەکەکێ بوونە، لێ هەیا نها نایێ زانین زیانێن جانی یێن پەکەکێ د ڤێ ئیریشێ دا چەند بوونە.