ئێكه‌تیێ ژ نوو زانی هاریكارییا وێ بۆ په‌كه‌كێ شاشییه‌كا مه‌زن بوو ئه‌نجام دای
هه‌ركو دچه، چالاكیێن ب گومان یێن رێخستنا په‌كه‌كێ ل هه‌رێما باشوورێ كوردستانێ پێتر دبن، ل پارێزگه‌هییا سلێمانیێ ئاگاهی هه‌نه كو ئه‌ڤ رێخستن ل ژێر ناڤێن جودا ناڤه‌ندێن رۆشه‌نبیری و جڤاكی ئاڤا كرنه، لێ به‌لێ د راستی ده، ئه‌و ڤان ناڤه‌ندان ژ بۆ راكێشانا زارۆكان و ره‌ڤاندنا وان ب كار تینه.
پێگه‌ها ئه‌لعه‌ربی ئه‌ل جه‌دید دوهـ رۆژا یه‌كشه‌می 3/1/2021ان، راپۆره‌ك ل ده‌ربارا لڤ و ته‌ڤگه‌رێن رێخستنا په‌كه‌كێ ل سلێمانیێ پارڤه‌كر و تێده به‌حسا مه‌سه‌له‌یا ره‌ڤاندنا زارۆكان و پێوه‌ندیێن یه‌كێتییا نشتیمانی یا كوردستانێ ل گه‌ل په‌كه‌كێ كرنه.
د راپۆرێ ده هاتییه ته‌سبیت كرن كو رێخستنا په‌كه‌كێ ل باژارێ سلێمانیێ، د بن ناڤێ کۆمەلە، کۆم، تەلەڤیزیۆن، سینەما، ناڤەندێن رۆشەنبیری و سازیێن جور ب جور دە، زارۆکان درەڤینن و خەلکێ گژ دکە ژ بۆی توندی و خرابکاریێ.
ئه‌ل عه‌ره‌بی ئه‌ل جه‌دید كو پێگه‌هه‌كه ب باندۆره د قادا مه‌دیایا عه‌ره‌بی ده، ل سەر ڤێ مژارێ، ب پارلەمەنتەرێ بەرێ و چاڤدێرێ سیاسی، عەبدولسەلام بەرواری ره ئاخڤی یه.
عه‌بدولسه‌لام به‌رواری وها گۆت: «ل دەڤەرا سلێمانیێ ھنەک ووسا ھزر دکن کو ب بھێزکرنا په‌كه‌كێ دکارن زیانێ ل ھەڤرکێن خوە بدن، ژ بەر وێ ژی مەیدان بۆ خەباتێن په‌كه‌كێ تێ ڤەکرن، لێ به‌لێ پارتیێن كو ل سلێمانیێ د خه‌به‌تن، ژ نووڤه زانین كو ئالیكارییا وان ژ بۆی په‌كه‌كێ شاشێتی بوو هاتییه ئه‌نجام دایین، ژ به‌ر كو زرارا ڤێ ئالیكاریێ ب وان ب خوه كه‌تییه».
عەبدولسەلام بەرواری ھەر وھا گۆت: «په‌كه‌كه ژ شەرێ داعشێ كه‌تییه سلێمانیێ و کامپ ژ خوە رە چێکر، زارۆکان دبن و دکن چەکدار، ئارمانجا وان ژی ئەو حکوومەتا ھەرێما کوردستانێ ل بەر چاڤێن خەلکێ سڤک بکن، ژ بەر وێ ژی د خوەپێشاندانێن سلێمانیێ دە ئێرشی بارەگەھێن پارتییان و حکوومەتێ کرن».
ب گۆتنا وی چاڤدێرێ سیاسی،یێن کو دەریێن سلێمانیێ ژ په‌كه‌كێ رە ڤەکرن، نھا دزانن کو کارێ وان خراب بوویە و په‌كه‌كه دخوازە ببە ئالتەرناتیفا وان و خوە ب سەر وان دە بسەپینە.
