سەرۆکێ نوونەرتیا ئەنجومەنا نشتمانی یا کورد ل سووریێ (ئەنەکەسێ)یا ل ھەرێما کوردستانێ عەبدولکەریم میرانی ل سەر داخویانیێن پێکئانینا ھلبژارتنان ل رۆژئاڤایێ کوردستانێ گۆت، ئەو نە دژی ھلبژارتنێن رۆژئاڤایێ کوردستانێ نە، لێ بێی رێکەفتنا ل گەل پارتیێن یەکیتیا نشتمانییا کوردی (پەیەنەکێ) ئەو بەشداری ھلبژارتنان نابن.
سەرۆکێ نوونەرتیا ئەنەکەسێ ل ھەرێما کوردستانێ عەبدولکەریم میرانی، ل سەر مەرجێن ھلبژارتنێن رۆژئاڤایێ کوردستانێ و دیالۆگا کوردی-کوردی ژ بۆ رووداوێ دایە خویاکرن، ئەو ب هیچ شێوەیەکێ نە ل دژی ھلبژارتنا نە ب مەرجێ کو ل سەر زەمینەیەکا ئارام و د دەمەکێ گونجاو دا بیت.
میرانی دیار کر: “نھا دو ئالیێن سەرەکی یێن رۆژئاڤایێ کوردستانێ، ئەنەکەسە و پەیەنەکە د ناڤ دانووستاندنان دا نە و ھێژ نەگھیشتنە ئەنجامەکێ. ئەم ب ھێڤی نە کو بگھین ئەنجامەکێ.. ھەروھا نیڤا رۆژئاڤایێ کوردستانێ نھا د بن داگیرکەریێ دایە و ژ بلی ڤێ خەلک کۆچبەر بوونە، ئەڤ ھلبژارتن دێ ب چ شێوەیەکی هێن ئەنجامدان. ئەگەر ھلبژارتنەک بهێتە کرن دڤێت د بن چاڤدێریا نەتەوێن یەکبوویی و وەلاتێن ئەورۆپایێ دا بیت.”
میرانی دەستنیشان کر کو بێی رێکەفتنا د ناڤبەرا ئەنەکەسێ و پەیەنەکێ دا ئەو بەشداری ھلبژارتنان نابن و ئەو یەک ژ مەرجێ بەشداریا وان یا د ھلبژارتنا دایە.
میرانی ھەروھا گۆتیە، ئەو ژ دەما ھلبژارتنێ و ژ وێ یەکێ کو ھلبژارتن ل دەڤەرێن کو عەرەب لێ دژین بێن کرن نەرازی نە و دایە خویاکرن کو ئەو ناخوازن دژبەرەکی دی ژی ژ بۆ خوە پەیدا بکن.
عەبدولکەریم میرانی ھەروھا ببیر خستیە، “ئەڤ دەما کو رۆژئاڤا تێدا دەرباس دبیت، ئەگەر ھلبژاتن بێن کرن، ئەڤ ھلبژارتنە سەرکەفتی نابن.”
