جیگرێ ھەڤسەرۆکاتیا مەجلیسا رێڤەبەر یا رێڤەبەریا خوەسەرا ل رۆژئاڤایێ کوردستانێ بەدران چیاکورد، ل سەر ئێریشێن ترکیا و کۆمێن چەکدار ل سەر باژێرۆکێ عەین عیسایێ دا گۆت، ترکیا نە تەنێ ل داگیرکرنا عەین عیسایێ دفکرە، ھەروھا کۆبانێ، منبج و جزیرێ ژی د رۆژەڤا وێ دایە.
بەدران چیاکورد ب بیر خست کو عەین عیسا ناڤەندەکا رێڤەبەری و سیاسی ژ بۆ رێڤەبەریا خوەسەر بوو و دیار کر کو دخوازن ببێژن: “مە جھێ رێڤەبەریا خوەسەر داگیر کر و مە داوی ل پرۆژەیا وان ئانی.” چیاکورد ل سەر ئێریشان ھشیاری دا خەلکێ و داخواز کر، ھەموو تەدبیرێن خوە بگرن و پشتگریا ھەسەدێ بکن.
بەدران چیاکورد ھەروھا دا زانین کو وان ل گەل رووسیایێ هیچ لھەڤکرن ل سەر رادەستکرنا عەین عیسایێ ژ بۆ حکومەتا شامێ چێنەکرنە و ئەو ڤێ یەکێ ناپەژرینن. جیگرێ ھەڤسەرۆکاتیا مەجلسا رێڤەبەرا رێڤەبەریا خوەسەر داخواز ژ رووسیایێ کر، “ب بەرپرسیاریا خوە رابیت و زەختێ ل ترکیێ بکەت داکو گرێدایی پەیمانا ئاگربەستێ بمینیت. دڤێت رووسیا ب جدی کار بکەت و داوی ل داگیرکەریا دەولەتا ترک بینیت.”
چیاکورد دەستنیشان کر کو ئەگەر ئارامیا ھەرێمێ تێک بچیت دێ بیتە سەدەمەک کو ھێزێن تەرۆریست سوودێ ژێ وەرگرن و خوە ب رێخستن بکن. جیگرێ ھەڤسەرۆکاتیا مەجلیسا رێڤەبەر گۆت: “رووسیا ب ڤێ سیاسەتا نھا کو ھندەک ئالیان ب ھندەک ئالیێن دی بترسینیت، ھەر بازاران دکەت و ژ بۆ دەمێن کورت کار دکەت کو مەبەستا وێ یە ل دژی ھێزێن دی خوە ب جھ بکەت. لەورا ئالۆزی کوورتر دبن و ئەڤ یەک ژی ناکەڤیتە خزمەتا ئارامی و پێڤاژۆیا ھەیی.”
