باله‌فرێن جه‌نگێ یێن ده‌وله‌تا تركیێ ئه‌ڤرۆ ئێریش لڤ و ته‌ڤگه‌رێن چه‌كدارێن په‌كه‌كێ ل سنۆرێ پارێزگه‌ها دهۆكێ یا باشوورێ وه‌لات كر و دوو رۆكێت لێداینه.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئه‌ڤرۆ رۆژا ئێكشه‌مبیێ 10/1/2021ێ، باله‌فرێن جه‌نگێ یێن ده‌وله‌تا تركیێ، حه‌ره‌كه‌تا چه‌كدارێن په‌كه‌كێ ل ده‌ڤه‌را ب ناڤێ «گه‌لیێ بازێ» كو دبیته ئاقارێ گوندێ بازێ یێ گرێدای ناڤچه‌یا كانی ماسێ هه‌ده‌ف كر.
هه‌روه‌ها ده‌ست نیشان كر، ئه‌ڤ ئێریش ل ده‌مژمێر 11:40 به‌ر نیڤرۆژێ پێكهاتییه، باله‌فران دوو رۆكێت ل خالێن په‌كه‌كێ ل گه‌لیێ بازێ داینه.
هه‌ر چه‌ند كو زیانێن جانی یێن په‌كه‌كێ نه‌هاتینه زانین، لێ به‌لێ ل گۆر دیمه‌نێن ئێریشێ كو ژ چاڤكانیێن مه ل باشوور هاتینه شاندن، دۆمانه‌كه مه‌زن ل جهێ كه‌تنا رۆكه‌تان به‌رز بوویه.
رێخستنا په‌كه‌كێ هه‌ر كو دچه حه‌ره‌كه‌تا چه‌كدارێن خوه دئێخیته ناڤا گوند و نێزی باژارۆكان، ئه‌ڤ یێك ب ئامانجا ڤالاكرنا ڤان گوندان دهێت ژ بۆ كو ببن مه‌یدانا شه‌ر، وه‌لاتیێن گوندێن باشوور ب تایبه‌ت یێن سنۆرێ پارێزگه‌ها دهۆكێ پر ژ ڤێ هه‌نگاڤا په‌كه‌كێ عاجزن و دخوازن په‌كه‌كێ ژ ناڤچه‌یێن وان دوور ببیت.
