ئەنجوومەنا نشتمانییا کوردی ل سووریێ ئه‌نه‌كه‌سێ، داخویانیێن ل دژی پێشمەرگەیێن رۆژ شەرمەزار دکەت و داخوازێ ژ ئالیێن گەرەنتیکارێن دیالۆگا کوردی دکەت سنۆرەکێ بۆ ڤان داخویانییان دانیت و رادگه‌هینیت، «ھەر دەستدرێژییەکا ل سەر پێشمەرگەیێن رۆژ، دەستدرێژی و شڤكاتییه ب ھەر مالباتەکا كورد».
ئەمیندارییا گشتییا ئه‌نه‌كه‌سێ داخویانییا ئەندامێ دەستەیا سەرۆکاتییا په‌یه‌دێ ئالدار خەلیل شەرمەزار کر و د داخویانیەکێ دا راگه‌ھاند، «د ده‌مه‌كی دا گەلێ کورد ل به‌ندا گه‌هشتنا ب رێکكەفتنا یەکرێزیێ نە، ھنده‌ك سەرکردەیێن په‌یه‌دێ جار جار دەردکەڤن و داخویانییان ژ بۆ ھه‌لوەشاندنا دانوستاندنان دده‌ن، ئەو داخویانی ژی بەردەوامییا گه‌فكرنێ یه ل مالباتێن پێشمەرگەی، سۆتنا ئۆفیسێن ئەنه‌که‌سێ و پارتیێن وێ و گۆرکرنا راگه‌ھاندنێ ل دژی ئه‌نه‌كه‌سێ نە.”
د داخویانیا ئه‌نه‌كه‌سێ دا ھات: »داخویانییا ئالدار خه‌لیل کو پێشمەرگەیێن رۆژ ب چەتە ب ناڤ کرینە، ھەولەکە دی یه بۆ رەڤینێ ژ دانوستاندنێن کو ب سەرپەرشتییا ئامەریکا دهێنه برێڤەبرن و ھه‌لوەشاندنا یەکرێزییا کوردی یە، ژ بەر کو ئەو پرۆسە دێ رێ ده‌ته پێشمەرگەیێن رۆژ ڤەگەرن جھێ خوە یێن ئاسایی و بەرەڤانیێ ژ ھەرێمێن خوە كه‌ن».
د بەشەکێ دی یێ داخویانییا ئه‌نه‌كه‌سێ دا ھات: «ئەم وەک ئه‌نه‌كه‌سه تەکەزیێ ل وێ چه‌ندێ دكه‌ین كو ھەر دەستدرێژییەکا ل سەر پێشمەرگەیێن رۆژ، ب دەستدرێژی و سڤكاتی كرن ب ھەر مالباتەکا کورد دهێته هه‌ژمارتن کو کورێن وان ب خوینا خوە قوربانی بۆ بەرەڤانیكرنێ ژ خاک و گەلێ کوردستانێ داییه».
ھەروه‌ھا ئه‌نه‌كه‌سێ د داخویانییا خوە دا گۆت: «ئەم داخواز ژ ئالیێ گەرەنتیکارێ دانوستاندنێن کوردی ئامەریکا و هه‌سه‌دێ دکه‌ین سنۆرەکی بۆ ڤان دەستدرێژی و زێدەگاڤییان دانن و کەسێن كو باوەرییا ب یەکرێزییا کوردی نینە ژ دانوستاندنان دوور بێخن».
ئه‌نه‌كه‌سه رادگه‌هینیت، ل ده‌مه‌كی ئەم ڤان داخویانییان شەرمەزار دکه‌ین، بۆ گەلێ کورد دوپات دكه‌ین كو كوڕێن وان یێن پێشمه‌رگه، خوە ژ بۆ بەرەڤانییا ژ گەلێ کورد تەرخان کرینە.
د داویا داخویانیێ دا ژی ئەنه‌که‌سه دبێژیت: «ئەم تەکەزیێ ل پابەندبوونا خوە ب بەردەوامییا دانوستاندنان ل سەر پرەنسیپێن کو مه رێككه‌فتن ل سه‌ر كرییه و ل سه‌ر بنگه‌ها رێككه‌فتنا دهۆكێ».
