دادگه‌ها رژێما ئیسلامییا ئیرانێ، سوبه رۆژا یه‌كشه‌مبی دێ گرتییه‌كێ دی یێ كورد سێداره ده‌ت، ئه‌ڤ گرتییه ده‌ما دوو رۆژانه بۆ ژوورا سێدارێ هاتییه ڤه‌گوهاستن.
رێخستنا هه‌نگاو یا مافێن مرۆڤان ئه‌شكه‌ره كر، سوبه رۆژا یه‌كشه‌مبی 17/1/2021ێ، جه‌زایێ سێداره‌دانێ ل سه‌ر زیندانیێ كورد یێ ب ناڤێ فاتح قادری دێ ل زیندانا ناڤه‌ندییا باژارێ سنه یێ رۆژهلاتا كوردستانێ هێته ب جهـ ئینان، قادری ژ رۆژا پێنجشه‌مبی یا رابووری، بۆ ژوورا سێدارێ هاتییه ڤه‌گوهاستن.
ده‌ست نیشان كر، فاتح قادری ب توهه‌مه‌تا كوشتنا كه‌سه‌كێ ب جه‌زایێ سێداره‌دانێ هاتییه مه‌حكووم كرن و نھا د گرتیگەھا ناڤەندییا باژارێ سنە دایە.
ئاگاھی دده‌نه زانین، بەرپرسێن گرتیگەھێ گۆتینە، فاتح قادری دێ ل رۆژا 17 ڤێ مەھێ هێته سێداره دان.
فاتح قادری ته‌مه‌ن 46 ساله و خەلکێ گوندێ دەل یێ باژارێ سنەیە، به‌ری سێ سالان ب تۆھمەتا کوشتنا کەسەکی ب ناڤێ ناسح ھاتبوو گرتن و ب سێداره‌دانێ ھاتبوو مەحکووم کرن.
