سێ هەموەلاتیێن رۆژئاڤا کو وەکو پەنابەر ل باشوورێ کوردستانێ دژییان، پشتی ژ بۆ سەرەدانکرنا خزمێن خوە ڤەگەریە رۆژئاڤا ژ لایێ هێزێن یەپەگێ ڤە هاتنە دەستەسەرکن.
چاڤکانیێن پێگەها دارکا مازی ئاشکەرا کرن سێ هەموەلاتیێن کورد یێن رۆژئاڤا کوردستانێ کو ل سالا 2012ێ وەکو پەنابەر دەرباسی باشوورێ کوردستانێ بووبوون پشتی 8 سالان خواست ژ بۆ سەرەدانکرنا خزم و کەسێن خوە دەرباسی رۆژئاڤا ببن لێ بەلێ هەر سێ کەس ژ لایێ هێزێن یەپەگێ ڤە هاتنە دەستەسەرکرن و حەتا نها د زیندانێ دا نە.
چاڤکانیێن پێگەها دارکا مازی ئاشکەرا کرن هەر سێ هەموەلاتیێن ب ناڤێ “عەبدولکەریم مەحموود ئووسێ – حەمید عەبدی شێخۆ و دلۆڤان محەمەد قاسم” ل رۆژا 7/10/2020ێ ل گوندێ “علیوکا- ناحییا رەبیعە” دەرباسی رۆژئاڤایێ کوردستانێ بوونە لێ راستەراست ژ لایێ هێزێن یەپەگێ ڤە هاتینە دەستەسەرکرن و ژ بۆی زیندانەکێ ل دێرکێ هاتینە ڤەگوهاستن.
هەموەلاتی عەبدولکەریم مەحموود شێخۆ خەلکێ گوندێ “تل تەمر یێ سەر ب پارێزگەها حەسەکێ یە” ل سالا 2012ێ وەکو پەنابەر دەرباسی باشوورێ کوردستانێ بوویە و ل کۆمەلگەها دومیز یا سەر ب ناحیا فەییدیێ ڤە نێشتەجێ بوویە و و دوکانەک ژ بۆی کارێ گوهرینا روونێ ترۆمبێلێ ب ناڤێ روون گوهرینا شێخۆ ڤەکریە و تێدا کار کریە.
حەمید عەبدی شێخۆ، خەلکێ گوندێ “عەلیوکا یێ سەر ب ناحیا رەبیعە” یە، ئەو ژ هۆزا “میرا”یە و پێشمەرگەیێ سەر ب لیوایا جزیرێ یە.
دلۆڤان محەمەد قاسم، خەلکێ گوندێ “عەلویکا یێ سەر ب ناحیا رەبیعە” یە، ژ هۆزا “میرا”یە ل باژارێ زاخۆ نشتەجێ بوویە.
هەرچەند دهێتە زانین کو ئەڤ کەسە ژ لایێ یەپەگێ ڤە هاتینە دەستەسەرکرن لێ بەلێ حەتا نها نەهاتیە زانین سەدەما دەستەسەرکرنا وان چ بویە و بۆچی هاتینە دەستەسەرکرن، یەپەگێ ژی چ داخویانی ل سەر دەستەسەرکرنا ڤان هەموەلاتیێن کورد نەدایە.
ژ ئالیێ خوە ڤە مالباتێن ڤان گرتیێن د دەستێ یەپەگێ دا داخواز دکەن ب زووترین دەم ئەڤ کەسە بهێنە ئازادکرن و ڤەگەرن ناڤا مالباتێن خوە، ژ بەرکو ئەو کەسێن پاکژن و هیچ تاوانەک ئەنجام نەدایە کو ب ڤی ئاوا بهێنە دەستەسەرکرن.
