کۆنسۆلێ گشتی یێ بریتانیا ل ھەرێما کوردستانێ جێمس تۆرنتۆن دا خویاکرن کو ئەو دخوازن رێکەفتنەکا دەمدرێژ ل سەر پرسا دارایی و بودجە دا د ناڤبەرا ھەولێر و بەغدایێ دا بهێتە کرن و گۆت، بریتانیا د گەلەک واران دا هەماهەنگیێ ل گەل ھەرێما کوردستانێ دکەت.
کۆنسۆلێ گشتی یێ بریتانیا ل ھەرێما کوردستانێ ژ بۆ کەنالێ کوردستان24 ئاخڤت و راگەهاند: “ئەم وەک دۆستەکێ ھەرێما کوردستانێ، دخوازین رێکەفتنەکا ھەڤسەنگ د ناڤبەرا ھەولێر و بەغدایێ دا بهێتە کرن، ب تایبەت ل سەر پرسا دارایی. ئەم ڤێ پرسێ ھەر دەم ل گەل بەرپرسێن ئیراقێ باس دکەین، ل ڤر ژی حکوومەتا ھەرێما کوردستانێ ھان ددەین ژ بۆ کو رێکەفتنێ لگەل بەغدایێ بکەت. نھا کو پرۆژەیاسایا بودجەیێ ژ بۆ پەرلەمانێ ئیراقێ ھاتیە شاندن، ئەم ھێڤیدارین ئالیێن سیاسی ڤێ پرۆژەیاسایێ پەسەند بکەن.”
جێمس تۆرنتۆن دبێژیت؛ “ئەم د گەلەک واران دا هەماهەنگیێ ل گەل ھەرێما کوردستانێ دکەین، یەک ژ وان بەرنامەیا چاکسازیێ د ناڤا وەزارەتا پێشمەرگە دایە، ئەم ھەول ددەین ھەموو ھێزێن پێشمەرگە د بن ناڤێ وەزارەتا پێشمەرگە دا کۆم ببن.”
