ئێرشەکا رێکخستی و پلانکری ل دژی ھەرێما کوردستان و ب تەیبەت ل دژی پەدەکێ و بارزانی دهێتە مەشاندن.
ژ شەرێ داعشێ و ھەیا ئیرۆ ل ناڤەندا بەغدا و ل پشت پەردێ ژی ب پشتەڤانییا دەولەتێن ھەرێمێ( داگیرکەرێن کوردستانێ) ژ بۆ تێکبرنا ھەرێما کوردستانێ و نەھێلانا ستاتوویا کوردستانا فەدەرال گاڤ ب گاڤ دهێتە مەشاندن. ب تەیبەت ڤان رۆژێن دەرباز بوویی ل چەند ناڤەندا ئەڤ پلانا هە ب چەند رەنگێن ئاشکەرا خوە بوون. دەمەک درێژ بوو، ب پشتەڤانی و رێبەراتییا پەکەکێ ب ھەمی رەنگان خواستن بارزانی بکێشن ناڤا شەرەک مالوێرانکەر کو ھەرێما کوردستانێ بەر ب ژناڤبرنێ ڤە ببن. لێ بارزانی ب سەبر و ژیری رێ ل ڤی شەری گرت، خوە ژ ڤی شەری دوور خست. لێ خوویایە ئەڤ ھەولدانێن ب ڤی رەنگی ھێژ بەردەوامن و ئێرشێن زالمانە ل دژی بارزانی و سیمبۆلێن کوردان دهێنە مەشاندن.
گەلۆ ما ژ نیشکەکێڤەیە( تەسادووفە) :
– ئالدار خەلیلێ کوو کەس نزانیت ژ بۆ کێ کار دکەت دەردکەڤیت د تەلەڤزیۆنا پەکەکێ دا دبێژیت 10 هزار پێشمەرگێن رۆژ چەتەنە.
– ژ ئالییێ دئ مەزلووم عەبدی کو سۆز دابوو ئالییێن کوردی پێک بینیت، ل ڤان سۆزان پۆشمان دبیت و دبیتە پارچەک ژ شەرەکی ئەرزان یێ پرۆپاگاندا پەکەکەێ و پێهنا خوە ل ھەولدانێن رێکەفتنا کوردان ل رۆژئاڤایێ کوردستانێ ددەت.
– ل سلێمانییێ ھند دۆستێن پەکەکێ و حەشدا شەعبی داخویانی دان و دخوازن سلێمانی و ھەلەپچە ژ ھەولێر و دھۆکێ جودا بکەن و ھەرێمەکا سەربخوە ئاڤا بکەن. ئەڤ ئارمانجا کو 15 سالن ئیران و شیعێن ئیراقی دخواستن بکەن و پێک نە ئانین ڤێجارێ ب دەستێ ڤان کەسێن هە دخوازن پێک بینن.
– ژ لایێ دی کەسەکی کو کەس نزانیت کییە؟ چییە؟ رادبیت ل سەر ناڤێ رێزدار سەرۆکێ ھەرێما کوردستانێ نێچیرڤان بارزانی بەلاڤۆکێن ساختە و دەرەو بەلاڤ دکەت، پەیوەندیێن ھەرێما کوردستانێ و ترکییێ رادوەستینیت، ھند کەسێن کو خوە رەوشەنبیرێن کورد ژی دبینین تەڤلی ڤێ کەمپینا بێ روومەت کرن و بێ ئیعتیبار کرنا رێزدار نێچیرڤان بارزانی دبن و ل ئالییێ دی ژی عاقلی د دەنە کوردا، سەرێ خوە ڤەشارتیە لێ لاشێ وان ژ دەرڤەیە و وە دزانن کورد دێ هێنە خاپاندن، خەلک وان نابینیت کو ئەو قەلەم شوورییێ ژ بۆ پەکەکێ و ئیرانێ دکەن.
-هەڤپەیمانیەک ژ ئالیێ کوردێن خوەفرۆتی کو ژ 15 پەرلەمانتاران پێک دهێت و ب هەموو رەنگان ل بن ناڤێ کوردایەتیێ دژایەتیا حکوومەتا باشوورێ کوردستانێ ب گشتی و بارزانی ب تایبەتی دکەن و دخوازن پێگەهێ هەرێما کوردستانێ لاواز بکەن.
-پەرلەمانتەرێن ئێکەتییا نیشتیمانی یا کوردستانێ کو گەلەک ب لاوازی ل پەرلەمانێ ئیراقێ بەرەڤانیێ ل حکوومەتا باشوور و ستاتۆیا وێ یا فەرمی و دەستۆری دکەن.
– ئەڤ ھەمی د دەمەکێ دا چێدبن کو ل ناڤبەرا بەغدا و ھەرێما کوردستانێ شەرەک مەزن ھەیە ب ھەر ئاوایی دخوازن ھەرێما کوردستانێ بفەتسینن.
گەلۆ ژ بۆ چ ئەڤە هەموو د ڤی دەمی دەا گەھشتن ئێک و پێکڤە ئێرشی ھەرێما کوردستانێ و بارزانی دکەن، تەنێ ھندەک کەسێن کو گەلەک جاران ل دژی پەکەکێ و ئاپۆ ژی خوە ددەنە نیشان بوونە پارچەک ژ ڤی شەری و ئالدار خەلیل و حەشدا شەعبی د شۆپینن؟
گەلۆ ئەڤە ھەمی پێکڤە ڤان رۆژان گەهشتینە ئێک ژ نیشکەکێڤەیە؟
وەکو ئەم دزانن و دبینن، پشتی شکەستنا ترامپ و رەوشا نوو یا ل ئەمریکا دهێەت چاڤەرێ کرن ھەڤکێشەیێن سییاسی ل جیھانێ و ھەرێمێ بێنە گوھارتن.
ئیران، ترکییا و دەردۆرێن وان د رەوشەکا زەحمەت دا نە و نزانن دێ چ بێ سەرێ وان هێت، ئەگەرا زێدە دێ رەوشەک گران و ئالۆز هێتە پێشییا وان ژ بۆنا کوردان دەرفەتەک نوو باشتر ژ سالێن بەرێ دێ چێبیت. ئەڤ ئەگەرا هە ژ نھا دا ئەڤ دەردۆرە خستنە ناڤا ترس و خۆفەکا مەزن، ب ھەمی رەنگان دخوازن ئاستەنگان ل پێشییا ھەرێما کوردستانێ چێکەن، ژبەرکو ھەرێما کوردستانێ دێ دۆزا کورد گاڤەک دی بەرەڤ پێش بەت.
گەر ھەرێما کوردستانێ ئارام و سەقامگیر بیتە ئەو دێ بیتە بنگەھەک باش ژ بۆ پێشدابرنا دۆزا کورد ب گشتی، ژ بەر ڤێ یەکێ ژی نەیار و دژمن ژ نھا دا کەتنە لڤ و تەڤگەرێ و دخوازن رێ ل پێشداچوونا دۆزا کوردا بگرن.
تێکبرنا ھەرێما کوردستانێ واتە تێکبرنا دۆزا کوردا، ئاستەنگ چێکرن ل پێشییا ھەرێما کوردستان ئاستەنگ چێکرنە ل پێشییا دۆزا کوردا. سەرکەفتنا ھەرێما کوردستان واتە سەرکەفتنا دۆزا کوردا. دڤێت دۆست و دژمن ل گۆرا ڤێ چەپەرێن خوە دییار بکەن.
رۆژەڤا کورد
