بەری سێ سالان، د 20 چلەیا 2018ێ دا ئارتێشا ترکیێ و گرووپێن چەکدارێن سەر ب وێ ڤە ئێریشی سەر عەفرینێ کرن و پشتی شەرێ 58 رۆژان عەفرین ھاتە داگیرکرن.
ئیرۆ، 20 چلەیا سالا 2021ێ و سێ سال بەرێ و رۆژا 20/12/2018ێ ئارتێشا ترکیێ ب تۆپ و مووشەکان گوند و ناڤچەیێن عەفرینێ راجۆ، شیێ، بلبلێ، شەرا، جندرێسێ، مابەتا و شێرەوا تۆپباران و بۆمبەباران کرن و گرووپێن چەکدارێن ئۆپۆزیسیۆنا سووریێ د بن فەرمانا ئارتێشا ترکیێ دا کار دکەن، دەست ب ئێریشا زەمنی ل سەر عەفرینێ کرن.
د ئێریشێ دا، مالێن سڤیلان، قۆتابخانە، ئاڤاھیێن فەرمی، نەخوەشخانە، مزگەفت، جھێن دیرۆکی و پیرۆز و ژێرخانا عەفرینێ ھاتنە بۆمەبارانکرن و وێرانکرن.
ژ بەر ئێریشێ و ل گۆر ئامارێن ھاتینە راگەھاند، زێدەتر ژ 300 وەلاتیێن عەفرینێ یێن سڤیل شەھید بوون و زێدەتر ژ 700 سڤیلان ژی بریندار بوون. ھەروھا زێدەتر ژ 250 ھەزار عەفرینی ژی ب نەچاری کۆچبەر و دەربدەر بوون، بەشەک مەزن ژ وان ل گوندێن د ناڤبەرا عەفرین و حەلەبێ دا مان و بەشەک دی ژی ل ھەمان دەڤەرێ د کامپان دا ھاتنە بجھکرن.
ئارتێشا ترکیێ و گرووپێن چەکدارێن سەر ب وێ ڤە، د رۆژا 18 ئادارا 2018ێ دا دەرباسی باژێرێ عەفرینێ بوون و داگیر کرن و دەست ب دزی و تالانا مال، ئاڤاھیێن فەرمی، دکان و سامانێن وەلاتیێن سڤیل کرن.
ژ رۆژا 18ێ ئادارێ ڤە، وەلاتیێن عەفرینێ د مەترسی و د بن گەفێ دا دژین. ب مەبەستا ستاندنا پەرەیان ژ مالباتێن عەفرینی ب ھەزاران خۆرت و کەچێن کورد ژ ئالیێ گرووپێن چەکدار ڤە ھاتن و تێنە رەڤاندن و راستی ئەشکەنجەیان تێن. ل گۆر ئامارێن چالاکڤانان، زێدەتر ژ 7 ھەزار وەلاتیێن عەفرینێ د ڤێ ھەیاما بووری دا ھاتنە رەڤاندن و تا نھا چارەنڤیسا زێدەتر ژ 2 ھەزار وەلاتیان نە دیارە.
ھەروھا ب ھەزاران عەرەبێن خووتایا شامێ، پارێزگەھا ئدلبێ و ناڤچەیێن جودایێن سووریێ ل عەفرینێ د مال و ملکێن کوردان دا تێنە بجھکرن و دیمۆگرافیا عەفرینێ دهێتە گوھارتن. ب سەد ھەزاران دارێن زەیتوونان ھاتنە دەستەسەرکرن و ب ھەزاران ژی دارێن زەیتوون و میوەیێن دی ھاتنە ھلکرن و قوتکرن.
ژ دەما داگیرکرنا عەفرینێ ژ ئالیێ ئارتێشا ترکیێ و گرووپێن چەکداران ڤە، پرانیا جھێن شوونواری یێن عەفرینێ ل سەر دەستێ ئارتێشا ترکیێ ب ئاموورێن کۆلاندنێ یێن مەزن ھاتنە کۆلاندن و وێرانکرن. ل گۆر چالاکڤانێن د وارێ شوونواران دا، عەنتیکە و شوونواران ژ گرێ جندرێسێ، کەلھا نەبی ھۆری، کەلھا سەمانێ و شکەفتا دودەری ھاتنە دزین و ژ ئالیێ گرووپێن چەکداران و بازرگانان ژ بۆ دەرڤەیی عەفرینێ ھاتنە دەرخستن.
رێخستنا مافێن مرۆڤان ل عەفرینێ بەلاڤ کریە، ئارتێشا ترکیێ و گرووپێن چەکدار زێدەتر ژ 50 جھێن شوونواری، گرێن دیرۆکی و مەزارگەھێن ئۆلی کۆلانە و زێدەتر ژ 20 ھەزار پارچەیێن عەنتیکان دزینە و ڤەگوھاستنە ترکیێ.
ل عەفرینێ گەلەک جھێن دیرۆکی ھەنە، ژ بلی کەلھا ھۆری، کەلەھا سامانێ، شکەفتا دودەری، کەنیسەیا مارمارۆن و ب دەھان شوونوارێن دی، نێزیکی 25 گرێن دیرۆکی ھەنە، پرانیا وان د بەر چەمێ عەفرینێ را رێزکری نە، کو دیرۆکا وان ڤەدگەریت ھەزار حەتا 2 ھەزار بەری زایینێ، پرانیا وان گران ب ئالاڤێن کۆلاندنێ ھاتنە کۆلاندن و تێکدان و گرووپێن چەکدار بەشەک ژ وان گران ژی کرنە ناڤەندێن سەربازی.
