روژا كو پەکەکە هاتیه دامهزراندن هەیا نها پەکەکە خوە وەکو چاڤکانیا پێدانا ناسنامەیا نهتهویێ د دەتە ناساندن، ژ بلی وان کەسێن کو ئەو ب کورد دبینیت چ کەسەکێ دی ماف نینە خوە ب کورد بزانیت و ببێژیت ئەز کوردم، ژ دەرڤەی ئایدۆلۆژییا پەکەکێ نابیت هیچ کەس و ئالیەک ببێژیت ئەز وەلاتپاریزم، ئەز کوردپەروەر و نیشتمانپەروەرم، بەلێ ئەڤە هزر و رامانێن پەکەکێ نە ژ بۆی پێدانا ناسنامەیا نەتوەیی ب هەر کەسکێ.
هزرا دانا ڤێ ناسنامەیێ ژی، ژ بۆ سهردهمێ دەستهلاتداریا دێرێ ل سەر ولاتێن ئەورۆپی ڤەدگەریت، دەما دهستههلات د دەستێن دێرێ دا زەلامێن ئۆلی یێن مەسیحی بازرگانی ب ئەردێ بحەشتێ و پاکژکرنا مرۆڤان ژ گونەهان دکر، ناڤێ ڤێ بازرگانیا ئۆلی ب چهكێن بێ گونههیێ ( صكوك الغفران ) دهاتە ناسکرن، ئهڤ چهكه ژ لایێ زەلامێن ئۆلی یێن مەسیحی ل بەرامبەر لێخوەشبوون ژ گونەهێن وان گونەهکاران ب كوژمهكێ پارهى دهاتنە فرۆتن. گونهههكاران پارە ددا و كهنیسێ ژى چهكهك بهرانبهر ددایێ ژ بۆ ژێبرنا گونههێن وان ل جەم خوەدایێ مەزن. سەرەرایێ ڤێ یەکێ ل وی سهردهمی ئەردێ بحەشتێ ژی دهاته فروتن و ههركهسهكێ خواستبا پارچهكا عهردى ل بحەشتێ ب دەست خوە ڤە بینیت دا چیتە دێرێ و پارچەیەک ئەردی ژ بۆ خوە کریت و پارەیێ خوە دەت و دێر ژی دا تاپۆیا ئەردێ بحەشتێ دەتە وی!
پەکەکە ژی ههمان كاری هەر ژ سالا 1976ێ حەتا نها ل باكورێ كوردستانێ و ل ئهورۆپایێ ب ناڤێ پێدانا ناسناما نهتهوهیی بوونى و پێدانا ناسناما جاشاتیێ ئەنجام ددەت. شەرت و مهرجێن پێدانا ناسنامەیا نهتهوی ل جەم پەكەكێ ئهڤەیە كو تو ببیه یەک ژ ئەندامێن وان و لگور ئارمانجێن وان کار بکەی، ل سەر کەسەکێ ژی کو دخوازیت ببیتە ئەندامەکێ پەکەکێ پێدڤیە:
1- یان ببیتە گهریلا و بچیته چیا داكو جانێ خو ژدهست بدەت .
2- یان ل ههموو خوەپێشاندانا سلوگان و وێنەیێ عبدوللا ئوجهلان بلند بكهت و ب سینگێ خو ڤهكهت و ل ناڤ مالا خو ل ژۆرا مێڤانا بلند هەلاویسیت .
3- یان کەسێ دخوازیت ببیتە ئەندام پێدڤیه باجێ بدەتە پەکەکێ.
4-چەپ و راست رەخنەیان ژ پارتێن كوردستانی بگریت.
لسهر ڤان چار مهرجان ئهڤە چهندین ساله چالاکیێن خوە برێڤە دبەن و بهدرهوامیێ پێ ددەن .
مهرجێن پێدانا ناسنامەیا جاشاتیێ ل جەم رێكخستنا پەكەكێ ژی ئەڤەنە :
1- تو د ناڤا هەر رێكخستنهكا دی یا كوردى یان كوردستانی دا بی ل وی دەمی تو کرێگرتی و جاشی .
2- گهر تو سهروكێ وان یان جورێ خهباتا وان رخنە بکەی دیسا تو جاشی .
3-باسکرن ل کوردستانەکا ئازاد و حەزکرن ژ ئالا و سەرۆک و رێبەرێن کوردان دیسا دچیتە خانا جاشاتیێ.
4-ژ بلی ترکیێ هەر دەولەتەکە دی وەکە دوژمن ببینی بکی دیسا تو جاشی.
5- نە ب تەنێ رەخنەگرتن ژ ئاپۆ، بەلکو خوە رەخنەگرتن ژ بچووکترین کادرێ پەکەکێ بەسە کو ناسنامەیا جاشایەتیێ ب تە بهێتە دایین.
ل سهر ڤێ بنگەهێ پەکەکە بوویه بازرگانا پێدانا ناسنامەیێن نهتهوی و جاشاتیێ. ژ بهر ڤێ یەکێ ژی گهر لێنێرەینەکا بلهز لسهر دیروكا پەکەکێ بكەین دێ ژ بۆ مە دیار بیت كا پەکەکێ چەند باندۆر ل مروڤێن نهتهوى و دیموكراسى و چڤاكى كریه، ب ڤى ئاوایێ خوارێ :
1- یان د ناڤا چڤاكی دا دێ هێتە ریسواکرن، مینا گهلهك هونهرمهند و نڤێسهر و رهوشنبیر وكورد پهروهر و كهسێن بهرنیاسێن جڤاكى .
2- یان كوشتیه و ژیانا وى ب داوی ئانییە .
3- یان سزا دایە و كەچ و كورێن وان ب دارێ زۆرێ ژێ ستاندینه و كرینه گهریلا .
3- یان مال و ئەردێ وان شەوتاندینە و ناچار كرینه ژ گوندێن خوە یان باژێرێن كوردى كوچبهر ببن ژ بۆ باژێرێن ترکیێ .
4- هەژمارەک هەری زێدە یا هونهرمهند و رهوشهنبیران ژ بەر گڤاش و گەف و زۆرداریا پەکەکێ دهست ژ هونهرێ خوە یان نڤێسێن خوە یان خهباتا خوە بەردایە، هونهرمهند ههیه دهما ل ناڤ رێخستنا پەکەکێ دا و بهشدارى ئاههنگهكێ ببا زێدهتر ژ ملیون كهسان ل باكور د ئاهەنگێ دا ئامادە دبوون، لێ دهما ههمان هونهرمهند دهست ژ پەکەکێ بەردای و چالاكیهك دی ئەنجام دای، ژمارا کەسێن ئامادە بوویی نەدگەهشت 10 كهسا، ئهو ژى نە ژبەرکو هونهرمهند یێ خودان شیان نهبوو یان بینهر نهبوو بهلكو پەکەکێ ئهو كارێ حهقیر د دهرحهقا هونهرمهندى دا دكر، د ئهنجام دا هونهرمهند ناچار دبوو یان ب سەربلندی دەست ژ هونەرێ خوە بەردەت و داویێ ب ژییانا خوە یا هونەری بینیت، یانژی ب سەرشۆری ڤەگەریتە ناڤا پەکەکێ دا و خوە رهخنه بكهت و خوە بێ رێز بكهت و خوە بگەهینتە ئاستا سفرێ، تاكو سهركردایهتیا پەكەكێ ژ وان قەبوول بكەت و ژییانا خوە یا هونەری بەردەوام بکەت.
ل ئەورۆپایێ کەسەک وەکو مارتن لۆسەر پەیدا بوو و د بەرناما خوە یا چاکسازییا ئۆلی دا رۆژەکێ سەرەدانا دێرێ دکەت و داخوازێ ژ کەنیسەیێ دکەت ل شوونا پارچەیەک ژ ئەردێ بحەشتێ، هەموو ئەردێ جەهنەمێ ب وی بفرۆشن! ب ڤێ داخوازێ هەر کەسەک تووشی سەرسۆرمانێ دبیت، چەوا دبیت کەسەک جەهەنەمێ ژ بۆ خوە بکریت! هەر چاوا بیت شییا هەموو ئەردێن جەهنەمێ ژ بۆ خوە بکریت، دەما ل دێرێ دەرکەفتی گۆتە خەلکێ من ئەردێ جەهنەمێ هەموو کری، ئێدی پێدڤی ناکەت هوون کەس ئەردێ بحەشتێ ب بوهایەکێ گران بکرن، ژبەرکو من جەهەنەم هەموو ژ بۆ خوە کری و هوون چ بکەن ئەز رێ نادەم یەک ژ وە بهێتە جەهەنەمێ! ل ئەورۆپایێ مارتن لۆسەر پەیدا بوو و خەلک هشیار کر و تەشقەلەیێن دێرێ ئاشکەرا کرن، گەلۆ ل کوردستانێ کی دێ ب ڤی رۆلی رابیت و راستییا پەکەکێ وەکو هەیی، وەکو بوویە داردەستا د دەستێ دەولەتێن داگیرکەر دا نیشانی کوردان دەت؟!
سمو مەحموود
بەرلین 14/1/2021