ژ بۆ وەفاتا دایکا فەرماندارێ گشتی یێ ھەسەدێ مەزلووم عەبدی گەلەک سیاسەتمەداران و دەسپێکێ سەرۆک و سەرۆک وەزیرێ ھەرێما کوردستانێ، پەیاما سەرساخیێ بەلاڤکر. کەجەکێ سازیا ھەری داوی بوو کو پەیاما سەرساخیێ بەلاڤکری. د پەیاما سەرساخیێ یا کەجەکێ دا کو د 21ێ چلە دا د ANF دا ھاتە بەلاڤکرن خالێن گەلەک بالکێش ھەنە.
بۆچی نە مەزلووم عەبدی، بەلکو شاھین جیلۆ؟
بۆچی کەجەکێ د داخویانیا خوە دا، فەرماندارێ ھەسەدێ مەزلووم عەبدی وەکی شاھین جیلۆ ناڤکر و نەگۆت مەزلووم عەبدی. وەکو کو دهێتە زانین کەجەکێ، ناڤێ شاھین جیلۆ کو ناڤێ مەزلووم عەبدی یێ د ناڤ پەکەکێ دا بوو بکار ئینا. ژ لایەکێ دی ڤە، مەزلووم عەبدی ژ لایێ رایا گشتی یا سیاسی و ھێزێن هەڤپەیمانیا ناڤدەولەتی ڤە دهێتە ب ناڤ کرن. وەکی دی، کەجەکێ د ھەمان داخویانیێ دا ژ مەزلووم عەبدی و دایکا ئەڤین گوی، گەریلایەکا ژن، بێی کو مەترسییا حەساسیەتێن سیاسی بەر چاڤ وەرگریت، پەیاما سەرساخیێ لێدا. ھەردو ژی وەکو “ھەڤالێن مە” هاتنە بناڤکرن. کەجەکە دشێت سەرساخیێ ژ مالباتێن گەریلا ئەڤین گوی یان گەریلایێن دی ژی بکەت. لێ دانانا ڤان ناڤان مل ب ملێ مەزلووم عەبدی ڤە نیەتەکا خراب نیشان ددەت. دەما کو ترکییا ژ بۆ ئێرشکەکا دی ل سەر رۆژئاڤا ل بەهانەیەکێ دگەریت پەکەکێ مەزلووم عەبدی وەکو شاھین جیلۆ دا ناسکرن. ئەڤ ھەلوەستا پەکەکێ گەلەکا بالکێشە.
بێ گومان ترکیا ب تەنێ ڤێ بەهانەیێ بکار نائینیت. یا کو دڤێت ل ڤێرە بهێتە دیتن ئەڤەیە کو حسابەکا کەجەکێ ھەیە. نها ل رۆژئاڤا یا کو ھەری زێدە ترکیێ عاجز دکەت و ب سەدەما وان گەفان دکەت، کەجەکە-پەکەکەیە. ژ بەر ڤێ یەکێ، پەکەکە دێ بێی دودلی نیشان دەت کو ل رۆژئاڤا مۆھرا وێ ھەیە. ژخوە ئەڤە ژی پارچەیەک ژ ڤێ پیلانێ یە کو ب خورتی وێنەیێن عەبدوللا ئۆجەلان ب گەلێ رۆژئاڤا دانە بلندکرن، و درووشم پێ دانە گۆتن. ئەگەر نە ھەر کەس باش دزانیت پرسگرێکا ئیمرالییێ نە پرسگرێکەکا ب وی رەنگی یە کو ل قامشلۆ و عاموودێ ب درووشما “بژی سەرۆک ئاپۆ” ڤە چارەسەر ببیت. ئارمانجا پەکەکێ ئەوە کو بێژیتە ترکییێ و ھەموو جیھانێ “لێ بنێرن ئەز ل ڤێرەمە.”
سەدەمەکا دی کو کەجەکە د داخویانییێ دا ناڤێ شاھین جیلۆ بکار دئینیت، ئەڤە یە کو پەیامەکێ بدەتە مەزلووم عەبدی. د واتەیەکێ دا، کەجەکە دبێژیتە مەزلووم عەبدی: ھوون کارمەندێن مە نە، ھوون نەشێن بچنە پێش مە، ھوون نەشێن ژ مە زێدەتر هەڤرکییان بکەن. بێ گومان، سەدەما ھەری گرینگا ڤێ یەکێ ئەڤەیە کو کەجەکە-پەکەکە دەستکەفتیێن گەلێ کورد ل رۆژئاڤا مۆنۆپۆل دکەت و سوودێن مەزن ژێ وەردگریت. داکو بەردەوامیا ڤێ یەکێ مسۆگەر بکەت، پەکەکە هزر دکەت کو “دڤێت وەسایەتا وێ یا ل سەر رێڤەبەرێن رۆژئاڤا بێ ناڤبەر بهێتە پاراستن”. ژ بەر ڤێ یەکێ دڤێت کو هیچ دەلیڤەیەک ب کەسەکێ نەهێتە دان کو ل دەرڤەی ستراتیژییا پەکەکێ کار بکەت. وەکو شوورێ دەمۆکلەس، دڤێت ھەردەم ل سەر سەرێ مەزلووم عەبدی و رێڤەبەرێن رۆژئاڤا بھەژیت. دیارە، ھەم سیاسەتا گشتی یا پەکەکێ و ھەم ژی ب تایبەتی سیاسەتا کادرۆیێن وێ “گەف و چاڤ ترساندنەکا دۆمدار”ە. ب ڤی رەنگی، ئەو ناھێلیت کو مرۆڤ ژ رێزا وێ (!) ڤەقەتن.
پەکەکە د سییاسەتێ دا “دایناسۆر بوونێ” فەرز دکەت
د ھەمان دەمێ دا ئالیەکێ دی یێ شۆلی ژی ھەیە. ئەندامێن دامەزرینەرێن پەکەکێ مینا سیتاڤکا عەبدولا ئۆجەلانن. ئەو وە دزانن کو چیایێن پچووک وان ئافراندینە، وان کوردستان رزگار کرییە. ل گۆری وان، ژ دەرڤەیی وان نابیت کەسەک دی دەرکەڤیتە پێش. پێویستە ژ بلی وان گەلێ کورد رێزێ ل هیچ کەس و لایەنەک دی نەگریت. ئۆجەلان خوەدایە و دامەزرینەرێن پەکەکێ ژی پێغەمبەرن. ھەر کەسێ دی عەبد و خزمەتکارێ وانە. پەکەکە خوەدییێ سیستەمەکێ ب ڤی رەنگی ھیەرارشکە ” سیستەما کو تێدا کەس یان تشت خوەدی پلەیێن جودا و دیارکری نە”. ناهێتە قەبوول کرن کو کەسەک ژ سنفا مریدی و عەبداتییێ دەربکەڤیت. گەر کەسەک پیچەک دەرکەڤیتە پێش، دێ سیستەم هەلوەشیت. لەوما رێڤەبریا پەکەکێ پێشکەتنا مەزلووم عەبدی و ب ناڤ و دەنگ بوونا وی قەبوول ناکەت. جوانبوون د سیاسەتا کورد دا ناهێتە تەحەموول کرن. دایناسۆر بوون ل سەر سیاسەتا کورد دهێتە فەرز کرن.
عەبدولا ئۆجەلان کارڤەدان نیشانی دەمیرتاش دا
ل گۆری مستافا قاراسو، مەزلووم عەبدی کەسەکێ لاوازە، کو پارادیگمایا “نموونەیا” نوویا پەکەکێ تێنەگەهشتییە. ب ڤی رادەی دەرخستنا مەزلووم عەبدی ژ بۆ پێش یاریەکا ب ھشمەندی یا ئەمریکایە. دڤێت ئەڤ یاریە بهێتە ژناڤبرن. جەمیل بایک ژی ھەمان هزرێ دکەت. ژ بەر ڤێ یەکێ، ژ لایێ دەروونی ڤە، ناهێتە قەبوول کرن کو مەزلووم عەبدی پەکەکێ ئانکو سەرکردایەتیا دامەزرینەر دەرباس بکەت. گەر بهێتە بیرا وە، پەکەکێ ژ بۆ سەلاحەدین دەمیرتاش ژی ھەمان کارڤەدان نیشان دا. ب ناڤ و دەنگ بوونا سەلاحەدین دەمیرتاش د ناڤ پەکەکێ و عەبدوللا ئۆجەلان دا بوو سەدەما کارڤەدانەک مەزن.
عەبدوللا ئۆجەلان ب خوە د تەباخا 2013ێ دا گۆتە سەلاحەدین دەمیرتاش، “ئەو تە ژ بۆ سەرۆکاتیێ ئامادە دکەن، ھایا تە ژێ ھەیە؟ ئەز فام دکەم، ھوون دلخوەشن، ھوون دشێن ب رێڤە ببەن، لێ پێشوەخت من تەدبیرێن رێبەریا خوە وەرگرتینە، ھوون ژی ڤێ بزانن” وی ھشیاری دا. ب راستی، ئۆجەلان ئەڤ ھشیاری پتر دژوار کر و ل دژی سەرۆکاتیا کۆنگرەیا 2 یەمینا ھەدەپێ د 22ێ خەزیرانا 2014ێ دا دەرکەت. ئاپۆ دخواست سەلاحەدین دەمیرتاش ژ سییاسەتێ دوور بێخیت و وی بکەتە سەرۆکێ شارادارییەکێ. وی ھەردەم فیگەن یووکسەکداخ دەردخست پێش و ئارمانچ دکر کو سەلاحەدین بمینیتە بن سیبەرا وێ دا. لێ وی دەمی رەوشا سییاسی یا ترکیەیێ ئەو قەبوول نەکر. نەخشەرێیا ئۆجەلان پێک نەھات. هێشا ژی ئەندامێن پەکەکێ یێن رادیکال دبێژن سەلاحەدین دەمیرتاش ب زانابوون ل دژی عەبدوللا ئۆجەلان وەکو ئالتەرناتف نیشان ددەن.
ب کورتی؛ کەجەکە-پەکەکە تو جاری قەبوول ناکەت کو کەسەک ژ عەبدوللا ئۆجەلان و گرۆپا ئەنقەرەیێ دەرباز ببیت. دیرۆکا کەسێن کو دخوازن ڤێ یەکێ د ناڤا پەکەکێ دا بکەن دهێتە زانین. گاڤا کو کەسەک پیچەکێ ب ناڤ و دەنگ دبیت، سەرێ وی دشەوتیت. مەزلووم عەبدی ژی ب ڤی شێوازی د بن زەختەکا مەزن یا پەکەکێ دایە. راستیا کو کەجەکە د داخویانیەکا فەرمی دا مەزلووم عەبدی وەکی شاھن جیلۆ و “ھەڤال” ب ناڤ دکەت ڤێ یەکێ نیشان ددەت. ئەم دێ ببینین کا د سییاسەتا پەکەکێ دا سیستەما داناسۆربوون دێ هێتە شکاندن یان نە.
