رێڤەبەریا خوەسەرا ل رۆژئاڤایێ کوردستانێ بەرسڤا داخویانیێن بەرپرسێن رێڤەبەریا شامێ یێن دەربارێ چەکدارکرنا زارۆکان ژ لایێ رێڤەبەریێ و ھەسەدێ ڤە دا.
رێڤەبەریا خوەسەر راگھاند، “ئەڤ سالە 11 زارۆک و ب گشتی حەتا نھا 116 زارۆک ژ لەشکەریێ ھاتنە ڤەگەراندن.”
رێڤەبەریا خوەسەر گۆتنێن جیگرێ وەزیرێ دەرڤەیێ سووریێ و نوونەرێ سووریێ ل نەتەوەیێن یەکبوویی بەشار جەعفەری کو گۆتبوو، ھەسەدە زارۆکان تەڤلی ھێزێن چەکدار دکەت رەد کر و دا خویاکرن کو ئەو ل گۆری بریارێن نی یێن کۆنسەیا ئەولەھیێ د گەل زارۆکان تەڤدگەرن و ژ بەر وێ ژی حەتا نھا 116 زارۆک ژ لەشکەریێ ھاتنە ڤەگەراندن و رادەستی دەستەیا پەروەردە و فێرکرنێ یا رێڤەبەریا خوەسەر ھاتنە کر داکو خوەندنا خوە تەمام بکەن.
رێڤەبەریا خوەسەر و ھەسەدێ خزیرانا 2019ێ ل گەل نەتەوەیێن یەکبوویی ل دژی چەکدارکرنا زارۆکان پەیمانەک ئیمزا کربوو و پشترا ژی ئۆفیسا پاراستنا زارۆکان ژ شەرێ چەکداری ل رۆژئاڤایێ کوردستانێ ھاتبوو دامەزراندن کو کارێ وێ شۆپاندنا مژارا چەکدارکرنا زارۆکان و ڤەگەراندنا وانە.
رێڤەبەریا خوەسەر راگھاندیە کو ب رێیا ئۆفیسا پاراستنا زارۆکان، سالا 2020ێ 28 زارۆک ھاتنە ڤەگەراندن بۆ ناڤ مالباتێن وان و سالا 2021ێ ژی 11 زارۆک رادەستی مالباتێن وان ھاتنە کرن.
ھەروھا ھاتە دەستنیشانکرن کو ژ دەما رێکەفتنا د ناڤبەرا ھەسەدێ و نەتەوێن یەکبوویی دا، ئەو کار دکەن ژ بۆ کو زارۆکان ڤەگەرینن و وان تێڤلی ھێزێن لەشکەری نەکەن.
