ب دەستپێشخەریا پارلامەنتەرێ دۆستێ کوردستانێ در. جۆرج دالامان یێ ژ پارتیا CDH یا بەلچیکایێ و ب پشتگریا پارتیا NVA، ئیرۆ ل پارلامەنتۆیا بەلچیکایێ پرۆژەیا ناساندنا ژەنۆسایدا ئێزدیان دەست پێ کر.
نوونەرێ حکوومەتا ھەرێما کوردستانێ یێ ل یەکیتیا ئەورۆپایێ دلاوەر ئاژگەیی ب داخویانیەکێ ئیرۆ 4ێ شوباتا 2021ێ راگھاند: “بریارە ئەڤ مژارو ل لژنەیا پەیوەندیێن دەرڤەیێن پارلامەنتۆیا بەلچیکایێ بهێتە گۆتووبێژکرن و پشترا د روونشتنەکا فەرمی یا پارلامەنتۆیا وی وەلاتی دا بێخن دەنگدانێ.”
نوونەرتیا حکوومەتا ھەرێما کوردستانێ یا ل یەکیتیا ئەورۆپایێ د پێوەندیەکێ دا لگەل جۆرج دالامان، “سپاسیا ھەولدانێن وی کر و پشتەڤانی و ئالیکاریا حکوومەتا ھەرێما کوردستانێ ژ بۆ سەرخستنا پرۆژەیێ راگھاند”.
دلاوەر ئاژگەیی دیار دکەت کو در. جۆرج دالامان دۆستەکێ نێزیکێ کوردستانێ یە و د دەمێن تەنگاسیێ دا پشتەڤانیا کوردستانێ کریە و چەند جاران سەردانا ھەرێما کوردستانێ و رۆژئاڤایێ کوردستانێ کریە.
در. جۆرج دالامان ئەندامێ لژنەیا پێوەندیێن دەرڤە یێن پارلامەنتۆیا بەلچیکایێ یە و بەری نها ئەندامێ رێخستنا جیھانی یا بزیشکێن بێسینۆر بوو.
