شرۆڤەکارێ سیاسی عەبدولهای ئۆکوموش ل سەر نیقاشێن پێکانینا دەستوورەکێ نوو بۆ ترکیێ راگھاند کو ھەژمارا دەستھلاتداریا ئیرۆ، تێرا گوھەرتنا دەستووری ناکەن و ژ بەر ڤێ یەکێ ئەڤ مژارە ب تەمامی بوویە بەهانەیەک ژ بۆ داگرتنا رۆژەڤا ترکیێ.
عەبدولهای ئۆکوموش ژ باژێرێ دیاربەکرێ بەشداری بولتەنا نووچەیان یا کوردستان 24ێ بوو و ل سەر مژارا پێکانینا دەستوورا نوو، کو نھا د رۆژەڤا ترکیێ دایە، بەرسڤا پرسیارێن جەمال باتون دان.
سەرۆک کۆمارێ ترکیێ رەجەب تەییب ئەردۆگان مژارا پێکانینا دەستوورەکێ نوو ئانیە رۆژەڤا ترکیێ و دەربارێ ڤێ مژارێ دا عەبدولهای ئۆکوموش دیار دکەت: “بێگومان پێویستیا کۆمارا ترکیێ ب دەستوورەکێ نوو ھەیە. دەستوورەک کو ب پیڤانێن جیهانی یێن دەمۆکراتیک بیت پێویستیەک پێ ھەیە، لێ بەریا نھا سەرۆک کۆمارێ ترکیێ بەحسا رەفۆرما دادوەریێ کر، یا یاسایێ کر، وی خواست ب ئاوایەکێ رۆژەڤا ترکیێ بگوھەرینیت. ل ترکیێ نھا د وارێ دەمۆکراتیک دا، ب تایبەتی د وارێ ئابۆری دا کار گەلەک زەحمەت برێڤەدچن و گەلەک پرسگرێکێن مەزن ھەنە.”
عەبدولهای ئۆکوموش بال کشاندە سەر وێ یەکێ کو دەستوورا نھا یا ترکیێ، دەستوورەکێ سەر دەما کۆدەتایێ یە و گۆت: “ژ سالا 1984ێ حەتا ئیرۆ، ئەڤ مناقەشە دهێتە کرن کو دڤێت ئەڤ دەستوورە ژ بنی ڤە بهێتە گوهەرین، لێ ھەر جارێ خالەک – دو خالێن وێ دگوهرن و بوویە دەستوورەکێ پنیکری، ژ بەر ڤێ یەکێ، ھندەک سیاسەتمەدارێن کورد، ھندەک سیاسەتمەدارێن هاریکارێن دەمۆکراسیێ یێن ترکیێ، ئەڤێ مناقەشەیێ ھەر دەم دکەن، لێ نھا پشتی کو ژ ئالیێ سەرۆک کۆمار ڤە ھاتیە رۆژەڤێ، ئەڤە دەرفەتەکە، لێ حەتا نھا دەستوورێ کو ھەیە ژی، ب ئاوایەکی بەرپرسیاری ژ بەر کو نایێن پێکانین، ئەولەھی ژی پێک ناهێت.”
ئۆکوموش ھەروھا دەستنیشان کر: “مەھەپە، ھەڤکارێ ئاکەپێ، باش دزانیت کو ھەژمارا دەستھلاتداریا ئیرۆ، تێرا گوھەرتنا دەستووری ناکەت و ل گەل ئۆپۆزسیۆنێ، ب تایبەتی ل گەل ھەدەپێ ھەڤدیتنا ناکەن، ژ بەر ڤێ یەکێ ئەو ژی باش دزانن کو نکارن دەستوورەکێ نوو ب ڤی ئاوایی پێک بینن و سەرەراست بکەن، ژ بەر ڤێ، ب تەمامی بوویە بەهانەیا داگرتنا رۆژەڤا ترکیێ، مخابن ئاک پارتی چەند رۆژەڤێ داگیر دکەت، جەهەپە ژی هند بوویە دووڤکا وێ و تەنێ رۆژەڤا کو ئاک پارتی تاڤێژیتە ھۆلێ، د چاپەمەنی و سیاسەتێ دا ل سەر ڤان بابەتان مناقەشێ دکەت.”
