د ناڤ مەھەکێ داھەری کێم 115 وەلاتیێن کورد ژ ئالیێ حکوومەتا ئیرانێ ڤە ب بەھانەیێن جور ب جور ھاتنە گرتن.
مالپەرا مافێن مرۆڤان یا ھەنگاوێ راگھاندیە، مەھا چلەیا ئیسال ل باژار و دەڤەرێن رۆژھلاتێ کوردستانێ ھەری کێم 115 وەلاتیێن کورد ب بەھانەیێن سیاسی، مەزھەبی و چالاکیێن سڤیل ھاتنە گرتن.
ل گۆری ئاگاھیان، 102 کەس ژ وان کەسێن کو ھاتنە گرتن، ب تۆھمەتێن چالاکیێن سیاسی و ھەبوونا پێوەندی ب پارتیێن کوردستانی یێن نەیارێن رێژیما ئیرانێ ھاتنە گرتن.
9 کەس ب تۆھمەتا چالاکیێن سڤیل و 4 کەس ژی ژ بەر باوەریێن خوە یێن مەزھەبی ھاتنە گرتن.
ھەری زێدە ل پارێزگەھا ئۆرمیێ گرتن ھەبوویە، ئەو ژی 72 کەس بوونە. ل سنە 27 کەس و ل کرماشانێ ژی 14 کەس ھاتنە گرتن.
د ناڤ گرتیان دا 9 کەس ژن بوونە، 4 کەس خوەندەکار بوونە، 2 کەس مامۆستا بوونە و 3 ژی رۆژنامەڤان بوونە.
