چاڤکانیەکێ ژ ناڤا باژێرێ شنگالێ راگھاند، ئەو کۆچبەرێن ژ کامپێن باشوورێ کوردستانێ ڤەگەریانە شنگالێ، دخوازن دیسا ڤەگەرن کامپان.
ل گۆری ئاگاهیێن ژ شنگال ژ بۆی رۆپەلا مە هاتینە شاندن دیار دبیت ئەو کۆچبەرێن شنگالێ یێن کو بەریا نھا ڤەگەریابوون شنگالێ، پۆشمان بوونە و دخوازن دیسا ڤەگەرن کامپان.
کۆچبەرێن کو ل سالا 2014ێ ژ شنگالێ دەرکەتبوون و ل باژێر و باژارۆکێن باشوورێ کوردستانێ د ناڤا کامپان دا ژیان دکر، پشتی لهەڤکرنا د ناڤبەرا هەڤلێر و بەغدایێ ژ بۆی ئاڤەدانکرنا شنگالێ و نۆرمالکرنا رەوشا وێ یا ئیداری و دەرکەتنا هێزێن چەکدار یێن نە یاسایی، هەژمارەک ژ خیزانێن ئێزدی ڤەگەرین شنگالێ، لێ نها و پشتی بوورینا دەمەکی کورت ئەو خێزان ژ بەر نەبوونا خزمەتگوزاری و خرابیا رەوشا ئەولەھیێ دخوازن دیسا ڤەگەرن کامپان.
ل گۆری ئاگاهیێن بەردەست، رۆژانە ئەو خیزانێن کو ڤەگەریانە شنگالێ، پێوەندیێ ب رێخستن و سازیێن جڤاکا سڤیل یێن هەرێمی و بیانی کو کارێ وان پەیوەستە ب کۆچبەران ڤە دکەن دیسا وان مالباتان ڤەگەرینن کامپێن ھەرێما کوردستانێ.
ژ بەر هێزێن چەکدار یێن سەر ب پەکەکێ و حەشدا شەعبی کو هەیا نها ل دژی هەموو بریار و رێکەفتنێن د ناڤبەرا بەغدایێ و هەڤلێرێ تەڤ دگەرن، شنگال وەکو کامپەکا لەشکری دیار دکەت و ژیان تێدا پڕ زەحمەت کەتیە، ب ئاوایەکی کو هەر کەس ژ ژیانا خوو ب گۆمانە، هەر وەها ترسا وان ژ وێ یەکێ هەیە کو زارۆکێن وان ژ لایێ ڤان هێزان ڤە بێن رەڤاندن، یانژی ب سەدەما هەبوونا وان هێزا ترکیا ئێریشی شنگالێ بکەت و جانێ وان جارەکا دی بکەڤیتە د مەترسیێ دا.
