دكتۆر رۆژ، كه‌ساتی و سیاسه‌تڤانێ دیارێ باشوورێ وه‌لات كۆچا داویێ كر
ئەندامێ پۆلیتبیرۆیا پارتییا دەمۆکراتا کوردستانێ، په‌ده‌كێ دکتۆر رۆژ نووری شاوەیس، ئیرۆ ل هه‌ولێرا پایته‌ختا باشوورێ وه‌لات کۆچا داویێ کر.
ئەندامێ پۆلیتبورۆیا پدکێ دکتۆر رۆژ نووری شاوەیس، ژ بەر نەخوەشییەکێ، ئیرۆ رۆژا دووشه‌می 15/2/2021ان دانێ سبێ ل نەخوەشخانەیەکە ھەولێرێ د تەمەنا 74 سالیێ دا کۆچا داویێ کر.
دکتۆر رۆژ نووری شاوەیس د ژیانا خوە یا سیاسی دا چەندین پۆست و ئەرکێن جودا وەرگرتبوون کو دەمەکێ سەرۆکێ پارلامەنتۆیا کوردستانێ بوو و د 2 کابینەیێن حکوومەتا ئیراقێ دا ژی وەزیر بوو، د ناڤا په‌ده‌كێ دا ژی چەندین ئەرکێن جودا پێ ھاتبوون سپارتن.
دکتۆر رۆژ كی یه؟
رۆژ نووری شاوەیس سالا 1947ان ل سلێمانیێ ژ دایک بوو، باڤێ وی نووری شاوەیس کەسایەتییەکێ کوردێ سیاسیێ دیار بوو، رۆژ نووری شاوەیس خوەندنا خوەیا سەرەتایی ل بەغدا، کەرکووک و مووسلێ کر و خوەندنا ئامادەھیێ ل سلێمانیێ تەمام کر.
د سالا 1966ان دەست ب خوەندنا ئەندەزیاریای ئەلکتریکێ ل زانینگەھا مووسلێ کر، پشترە ژی ژ بۆ خوەندنا بلند چوو ئالمانیایێ و دکتۆرا د ئەندەزیارییا ئەلکتریکێ دا وەرگرت، رۆژ نووری شاوەیس ل ئەورۆپایێ بوو نوونەرێ خوەندەکارێن کورد.
دکتۆر رۆژ نووری شاوەیس د سالا 2004ان دە بوو سەرۆکێ پارلامەنتۆیا کوردستانێ، پشترە بوو نوونەرێ سەرۆک بارزانی د ئەنجوومەنا دەستھلاتێ دا کو ل بەغدایێ ھات پێکانین و پشترە ژی پۆستێ سەرۆکۆمارێ ئیراقێ وەرگرت.
د سالا 2005ان دا، دکتۆر رۆژ بوو جیگرێ سەرۆکوەزیرێ ئیراقێ کو وێ دەمێ ئیبراھیم جه‌عفه‌ری سەرۆکوەزیرێ ئیراقێ بوو.
سالا 2010ان، جارەکا دن دكتۆر رۆژ بوو جیگرێ سەرۆکوەزیرێ ئیراقێ کو وێ دەمێ نووری مالیکی سەرۆکوەزیرێ ئیراقێ بوو.
د سالا 2014ان دە، دکتۆر رۆژ نووری شاوەیس د حکوومەتا حه‌یده‌ر عه‌بادی دا بوو جیگرێ سەرۆکوەزیرێ ئیراقێ.
چاڤكانی: كوردستان 24
