کلچدارئۆغلو بۆ ئۆپەراسیۆنا گارە میناکا ئۆجالان دا

کلچدارئۆغلو د دەربارێ ئۆپراسیۆنا گارە دا میناکا گرتنا ئۆجالان دا و دبێژیت بولەنت ئەجەڤید ئۆپەراسیۆنا گرتنا ئۆجالان خوە ژ بۆی ھەڤژینا خوە ژی نەگۆتیە.

سەرۆکێ پارتیا کۆماری یا گەل (CHP) کەمال کلچدارئۆغلو د جڤینا گروپا پارتیا خوە دا دەربارێ ئۆپەراسیۆنا ل چیایێ گارە و کوشتنا 13 دیالان دا ئاخڤت و رەخنە ل دەستھلاتێ گرتن.

کلچدارئۆغلو د دەربارێ کوشتنا 13 دیلێن کو د دەستێ پەکەکێ دابوون ئاماژە ب ڤێ یەکێ کر کو 5-6 سالان ئەو لەشکەر د دەستێ پەکەکێ دا بوونە و ژ بۆ رزگار کرنا وان تشتەک نەھاتیە کرن د ئەنجامێ دا ژی ئەو ئێخسیر تەڤ ھاتنە کوشتن.

کلچدارئۆغلو راگھاند کو ترکیا کەتیە رەوشەکا وسا کو ل سەر کوشتنا لەشکەران ژ ھەڤدو حەسابێ دپرسن.

ھەروھا کلچدارئۆغلو ل سەر کوشتنا ئێخسیران رەخنەیان ل دەستھلاتێ دگریت ژ بەر کو مژارا ئێخسیران ھەردەم پشت گوهـ هاڤێتیە.

کلچدارئۆغلو رەخنەیێن خوە ب ڤی رەنگی بەردەوام دکەت کو د دەربارێ مژارێ دا بۆچی پارێزگەرێ مەلەتێ داخویانیێ ددەت، وەک مژارا ئدلبێ کو 33 لەشکەرێن ترکیێ ھاتبوونە کوشتن و پارێزگەرێ ھاتایێ داخویانی بەلاڤ کربوو.

کلچدارئۆغلو دیار کر کو سەرۆککۆمارێ ترکیێ ئەردۆگان گۆتیە کو ئەو دێ مزگینیێ دەت لێ ھەموو ئێخسیر ھاتنە کوشتن پشترا ترسیانە کو داخویانەکێ ژی بدەن.

کلچدارئۆغلو د دەربارێ ئۆپراسیۆنا گارە دا میناکا گرتنا ئۆجالان ژی دا و دبێژیت بولەنت ئەجەڤید ئۆپەراسیۆنا گرتنا ئۆجالان خوە ژ بۆ ھەڤژینا خوە ژی نەگۆتیە.

دهێتە زانین کو ئارتێشا ترکیێ د 10ێ شوباتێ دا ل چیایێ گارە ئۆپەراسیۆنەک ل دژی پەکەکێ ب ناڤێ ئۆپەراسیۆنا چەنگێ باز-2 دەستپێ کر و د 14ێ شوباتا 2021ێ دا ب داوی ئانی، د ڤێ ئۆپەراسیۆنێ دا 13 ئێخسیرێن ترکیێ کو پێش نها ژ لایێ پەکەکێ ڤە هاتبوون دەستەسەرکرن د ئێریشێ دا هاتنە کوشتن، پەکەکێ ترکیا ب کوشتنا وان تاوانبار کر، و ترکیێ ژی پەکەکە تاوانبار کر.