5 مووشەک ب باژارێ عهفرینێ کەتن و د ئەنجامێ دا 13 وەلاتیێن سڤیل بریندار بوون، گرووپێن چەکداران یێن سەر ب ترکیێ ڤە ژی، گوندێن عهفرینێ یێن ناڤچەیا شێرەوا و ھەرێما شەھبایێ دان بەر تۆپان.
ل گۆر نهرینگهها سووری یا مافێن مرۆڤان، ل شەڤا دهرباسبوویی 5 مووشەک ل ناڤا باژارێ عهفرینێ کەتن، د ئەنجامێ دا 13 کەس بریندار بوون کو د ناڤا وان دا زارۆک ژی ھەنە، ئەو مووشەک ژ ناڤچەیێن باکورێ حهلهبێ یێن د دەستێ رژێما سووریێ دا ھاتنە هاڤێتن.
ژ ئالیەکی دی ڤە، گرۆپێن چەکداران یێن سەر ب ترکیێ ڤە ژ دەردۆرا گوندێن کشتیار و بێنێ یێن ناڤچەیا شێرەوا یا عهفرینێ و گوندێ قراھ و دەردۆرا کامپا سەردەم ل ھەرێما شەھبایێ یێن د دەستێ یەکینەیێن پاراستنا گەل یهپهگێ دا، دان بەر تۆپان.
پشتی داگیرکرنا عهفرینێ ژ ئالیێ سوپایێ ترکیێ و گرووپێن چەکدارێن سەر ب وێ ڤە ژ بەری 3 سالان، دۆرا 250 ھەزار کەسان ژ عهفرینێ دەربدەر بوون و ل تل رفعەت و دەردۆرا وێ «ھەرێما شەھبایێ» ب جھ بووینە.
ھەر جار ژی ئەو ھەرێم ژ ئالیێ گرووپێن چەکداران ڤە دهێته تۆپبارانکرن و خەلکێ سڤیل ژی دبیته قوربانی، رۆژا 23 مەھا رابووری ژی گرووپێن چەکداران باژارۆکێ تل رفعەتێ دانه بەر تۆپان و د ئەنجامێ دا 3 کەس ھاتنه کوشتن و 6 کەس ژی بریندار بوون.