كه‌نالا ئه‌لعه‌ره‌بیه‌ ئاگاهیێن نوو ل ده‌ربارا هێرشا سه‌ر هه‌ولێرێ ژ واشنگتونێ یا پایته‌ختا ئه‌مه‌ریكایێ ب ده‌ست ئێخستنه‌ و ل گۆر وان ئاگاهییان، «حه‌شدا شه‌عبی و رێخستنا په‌كه‌كێ» ئه‌ڤ هێرش ئه‌نجام داییه‌.

كه‌نالا «العربية/الحدث» د راپۆرته‌كێ دا‌ ئه‌شكه‌ره‌ كر، هه‌ر چه‌ند كو ئیران ره‌د دكه‌ت‌ وێ ده‌ست د هێرشا سه‌ر باله‌فرگه‌ها ناڤده‌وله‌تی یا هه‌ولێرێ و بنگه‌ها ئه‌مه‌ریكایێ دا هه‌بیت، لێ به‌لێ ئاگاهیێن كو چاڤكانیێن وان ژ رایه‌دارێن واشنگتۆنێ ب ده‌ست ئێخستنه‌، ئه‌شكه‌ره‌ دكه‌ن كو ئالیێن به‌شدار د هێرشێ دا هاتنه‌ ده‌ست نیشان كرن.

د راپۆرتێ دا هاتییه‌: «د سه‌ر ره‌د كرنا به‌رده‌وام یا ئیرانێ دا‌ ژ بۆی ده‌ستهه‌بوونا وێ د هێرشا رۆژێن رابووری یا سه‌ر باله‌فرگه‌ها هه‌ولێرێ و بنگه‌ها ئه‌مه‌ریكی، لێ به‌لێ چاڤكانیێن “العربية/الحدث” ژ هنده‌ك چاڤكانیێن باوه‌رپێكری ژ پایته‌ختا ئه‌مه‌ریكایێ دانه‌ زانین كو لێكۆلینا ل سه‌ر هێرشێ ده‌ست ب ئه‌شكه‌ره‌ كرنا ئالیێن به‌شدار تێدا كرنه، ژ گرنگترین پێشهاتێن نوو یێن لێكۆلینێ ئه‌ڤه‌یه‌ كو گرووپه‌كێ‌ گرێدایی “پارتییا كاركه‌رێن كوردستانێ” ده‌ست د مووشه‌كباران كرنا دۆربه‌را باله‌فرگه‌ها هه‌ولێرێ دا هه‌یه‌، هه‌موه‌خت گرووپه‌كێ‌ “حه‌شدا شه‌عبی” یا گرێدای ئیرانێ».

ئه‌لعه‌ره‌بییه‌ دبێژیت‌: «مووشه‌كێن د هێرشێ دا هاتنه‌ بكارئینان ئیرانێ ژ بۆ حه‌شدا شه‌عبی و په‌كه‌كێ دابین كرینه‌، لێكۆلینێن ئه‌مه‌ریكایێ نها ل ده‌ربارا چاوانییا هه‌مئاهه‌نگییا ل نێڤبه‌را حه‌شدێ و په‌كه‌كێ ژ بۆی ئه‌نجام دانا هێرشێ دهێنه‌ كرن».