پارتیێن باكور: پێویسته‌ په‌كه‌كه‌ رێزێ ل سه‌روه‌رییا باشوور بگریت

پارتیێن باكور: پێویسته‌ په‌كه‌كه‌ رێزێ ل سه‌روه‌رییا باشوور بگریت

هه‌ژماره‌كا‌ پارتیێن باكورێ كوردستانێ داخویانییه‌ك هه‌ڤپار به‌لاڤ كر و تێدا‌ ژبلی به‌حسا داگیركه‌رییا ل هه‌ر چار پا‌رچه‌یێن كوردستانێ، یه‌كرێزییا ئالیێن سیاسی خوه‌ستییه‌، هه‌روه‌ها بانگ ل په‌كه‌كێ كر رێزێ ل سه‌روه‌رییا باشوور بگریت.

هه‌ر یێك ژ پارتیێن «پاك، په‌ده‌كه‌-باكور، پێلكورد، په‌سه‌كه‌ و ته‌ڤگه‌را ده‌مۆكراتیك یا كوردستانێ»، داخویانییه‌ك هه‌ڤپار به‌لاڤ كر و تێدا یه‌كرێزییا گه‌ل و ئالیێن سیاسی یێن كوردستانی ژ بۆی رێگرتنێ ل پیلانێن ده‌وله‌تێن داگیركه‌ر خوا‌ستییه‌، هه‌روه‌ها بانگ ل رێخستنا په‌كه‌كێ كرینه‌ كو پێویسته‌ ئه‌و رێزێ ل سه‌روه‌رییا باشوورێ وه‌لات و رێڤه‌به‌ری و سازیێن وێ یین مه‌شرۆع بگریت.

د داخویانیێ دا هاتییه‌:  وەلاتێ مە کوردستان ژ دەرڤەیی ئیرادەیا گەلێ مە ھاتییە پارچە کرن، ئەڤە نێزیكی 100 سالانه‌ ترکیە، ئیران، ئیراق و سووریە، د مەسەلەیا کوردستانێ دا پلانێن رێلبەرگرتنا ئازادی، رزگاری و سەرخوەبوونا کوردستانێ بجهـ دئینن.

پارتیێ باكور ئاماژه‌ كرنه‌ كو ل باکورێ کوردستانێ و ل ترکیەیێ ئۆپەراسیۆنێن لەشکەری، دەستەسەر کرن، لێپرسین، زیندان، قەدەغە و رێلبەرگرتنا كارێن سیاسی و رامانی بوویە بەشەکێ ژیانا رۆژانە.

پارتیێن باكور ل ده‌ربارا رۆژئاڤا كوردستانێ بانگ ل ئه‌نه‌كه‌سێ و په‌یه‌نكێ كر كو «دیالۆگا كوردی» سه‌ربێخن و ل سه‌ر بنگه‌ها تفاقا دهۆكێ، ژ بۆ كو رێ ل به‌ر ده‌ستكه‌فتییان بهێته‌ ڤه‌كرن.

گۆت ژی: ئەم وەک پاک، پدک-باکور، پێلکورد، په‌سه‌ک، تەڤگەرا دەمۆکراتیکا کوردستانێ، پشتگرییا ھەولدانێن تفاقەکا کو د ناڤبەینا ھێزێن کورد و کوردستانی دا بهێته‌ كرن ژ بۆ ئاڤا كرنا ئیدارەیەکا ھەڤبەش دکه‌ین.

پارتیێن باكور د به‌شه‌كێ‌ دی یێ داخویانیێ دا‌ گۆتنه‌ كو حکوومەتا بەغدایێ، ترکیە و ئیران، پێكڤه‌ ژ بۆ كو دەستکەفتیێن ل باشوورێ کوردستانێ ژ ھۆلێ راکه‌ن، ژ بۆ كو رێ ل بەر سەرخوەبوونا باشوورێ کوردستانێ بگرن، پلانێن پر قرێژ دمەشینن، له‌وما ئیرۆ لێ خودان دەرکەتن و پاراستنا دەستکەفتنێن باشوورێ کوردستانێ، رێزلێگرتنا ئیرادەیا رەفەراندووما سەرخوەبوونێ یا 25ێ ئیلۆنا 2017ێ، وەک ئه‌ركه‌كه‌ نەتەوەیی، نشتیمانی ل سەر ملێن ھەر کورد و کوردستانییەکی یه‌.

پارتیێن باكور بانگ ل رێخستنا په‌كه‌كێ كر كو پێویسته‌ رێزێ ل سه‌روه‌رییا باشوورێ وه‌لات بگریت و گۆت: دڤێت په‌كه‌كه‌ و ھەموو ھێزێن چەکدار و یێن سیاسی، ھەموو دەولەتێن ھەرێمێ و یێن جیھانێ رێزێ ل بریار و سەروەرییا رێڤەبەرییا ھەرێما باشوورێ کوردستانێ بگرن.

پوستێن ھەمان بەش