ئەبو فەداک کییە و ل شەنگالێ چ دکەت؟

رێکەفتنا شەنگالێ یەک ژ وان رێکەفتنایە کو د ناڤبەرا حکوومەتا هەرێما کوردستانێ و حکوومەتا ئیراقا فەدەرال دا ژ بۆی ئاسایی کرنا رەوشا شەنگالێ و ڤەگەراندنا خەلکێ وێ کو پرانیا وان نها د ناڤا کەمپان دا د ژیانەکا دژوار دا نە هاتبوو ئیمزا کرن.

ئەڤ رێکەفتنە ب رەنگەکێ بەرفرەهـ ژ لایێ شەنگالیان ڤە هاتە پێشوازی کرن، شەنگالی ل وێ هێڤیێ بوون کو ب ڤێ رێکەفتنێ ئێدی ژیانا وان ئاسایی ببیت و هێزێن میلیشیا و نە یاسایی یێن د ناڤا شەنگالێ دا وێ دەرێ بجیهـ بهێلن و ئەو ژی ڤەگەرن مالێن خوە، لێ بەلێ ژبەرکو ئەڤ رێکەفتنە ل دژی “میحوەرا مقاوەما” ئیرانێ بوو، هەر د زوو دا دژاتیکرنا رێکەفتنێ ژ لایێ ئیرانێ و میلیشیایێن سەر ب وێ ڤە دەستپێکر، پەکەکە ژی یەک ژ وان رێخستنا بوو کو د ڤێ خەتێ دا جیهـ دگرت.

ب سەدەما جیگرتنا پەکەکێ د ناڤا شەنگالێ دا و چێکرنا چەندین هێزێن نە یاسایی کو مووچەیێ وان ژی ل گەل مووچەیێ میلیشیایێن حەشدا شەعبی دهێتە دایین، ترکیا رۆژ ناچیت کو گەفێن ئۆپەراسیۆنەکێ ژ بۆی داگیرکرنا شەنگالێ نەکەت، لێ بەلێ پەکەکە قەت گوهنادەتە ڤێ یەکێ و ل سەر کارێن خوە یێن ئیستیفزازی بەردەوامە، چەکدارێن پەکەکێ پێش نها ل دەما هاتنا هندەک هێزێن لەشکری یێن سەر ب حکوومەتا ئیراقێ ڤە بۆ ناڤا شەنگالێ بوو دەما 8 دەمژمێران ل ناڤا شەنگالێ دا دەرکەتن لێ بەلێ پشترا جلکێن میلیشیایێن حەشدا شەعبی ل بەر خوە کرن و جارەکا دی ڤەگەرین ناڤا شەنگالێ دا.

پشتی گەفێن بەردەوام یێن دەولەتا ترکیێ ب سەدەما هەبوونا چەکدارێن پەکەکێ د ناڤا شەنگالێ دا کو ترکیە وان چەکداران وەکو گەف ل سەر خوە دبینیت، بەردەوام گەفا ئۆپەراسیۆنەک لەشکری ژ بۆ داگیرکرنا شەنگالێ و ژناڤبرنا هێزێن پەکەکێ ل وێ ناڤچەیێ دکەت، ل همبەر ڤێ یەکێ و ژ بۆی پاراستنا “میحوارا مەقاوەمێ” کو پەکەکە ژی تێدا جیهـ دگریت، ئیرانێ گاڤەک جدی ئاڤێت و ل رۆژا 11/2/2021ێ “ئەبو فەداک یێ سەرۆک ئەرکانێ حەشدا شەعبی”  کو یەک ژ وان کەسانە کو ناڤێ وی د لیستەیا تەرۆریستان دا یە ل جەم ئەمریکا و کەسەکی باوەرپێکری بوویە ل جەم قاسم سولەیمانی یێ فەرماندارێ فەیلەقا قودس یا سوپایێ پاسدارێن ئیرانێ، شاند باژارێ شەنگالی.

چاڤکانیێن پێگەها دارکا مازی د ناڤا شەنگالێ دا ئاشکەرا کرن، ئەبو فەداک چوویە سنۆرێ د ناڤبەرا ئیراق و سووریێ دا، هەر وەها سەرەدانا (رۆژهلاتێ چیایێ شەنگالێ) ژی کریە، ئەبو فەداک وسا ددەتە نیشاندان کو ژ بۆی بنەجیهکرنا ئارامیێ چوویە شەنگالێ، لێ بەلێ د ئەساس دا ناڤبووری ژ بۆی ڤەشارتنا چەکدارێن پەکەکێ د ناڤا چەکدارێن خوە دا وپێشی لێ گرتنا جەبەجێکرنا رێکەفتنا شەنگالێ چوویە وێ دەرێ، ئەو ب هێزەکا هەری زێدە یا چەکدارێن سەر ب حەشدا شەعبی ڤە چوویە و دخوازیت پەکەکێ ژی د ناڤا ڤان هێزان دا ڤەشێریت داکو ب ڤێ یەکێ رێگریێ ل ئۆپەراسیۆنا چاڤەرێکری یا ترکیێ بۆ سەر شەنگالێ بکەت و میحوەرا مقاوەمێ یا ئیرانێ ل شەنگالێ بپارێزیت.

چاڤکانیێن پێگەها مە هەر وەها ئاشکەرا کرن ئەبو فەداک ل رۆژێن 11 و 12/2/2021ێ هێزەکا بێ هەژمار یا حەشدا شەعبی کو ژ 4 لیوایان پێک دهێت دەرباسی شەنگالێ کرینە.

حەتا نها ناڤێ سێ ژ لیوایێن چەکدارێن حەشدا شەعبی کو ژ بۆی شەنگالێ هاتینە شاندن، هاتینە زانین، ئەوژی ئەڤەنە:

1-لیوایا حسین یا سەر ب حەشدا شەعبی.

2-لیوایەکا رێخستنا بەدر.

3-لیوایەکا ب ناڤێ کەتائب سەید ئەلشووهەدا.

دهێتە زانین ل رۆژا 9/10/2020ێ رێکەفتنا د ناڤبەرا حکوومەتا هەرێما کوردستانێ و حکوومەتا ئیراقا فەدەرال ژ بۆی ئاسایی کرنا رەوشا باژارێ شەنگالێ هاتە ئیمزەکرن، ل گۆر ڤێ لهەڤهاتنێ حکوومەتا فەدەرال دێ دۆسیەیا ئەولەهیا باژێرێ شەنگالێ گریتە دەست و پێدڤییە هەموو هیزێن نە یاسای کو پەکەکە ژی د ناڤا وان دا یە ژ شەنگالێ دەرکەڤن.