سهرۆكوهزیرێ باشوورێ كوردستانێ، وهزیرێ ناڤخوه یێ ئیراقێ ژ خهتهرییا گوههرینێن دهمۆگرافی یێن ل ناڤچهیێن كوردستانی هایدار كر و راگههاند كو پێویسته رێ ل بهر ڤێ یهكێ بهێته گرتن.
مهسروور بارزانی سهرۆكوهزیرێ ئیرۆ رۆژا شهمبی 27/2/2021ێ پێشوازی ل ئۆسمان غانمی وهزیرێ ناڤخوه یێ حكوومهتا ئیراقا فهدهرال كر.
ل گۆری ئاگاهیێن كو ئۆفیسا چاپهمهنیێ یا سهرۆكوهزیر، مهسروور بارزانی رۆژهڤا ئیراقێ و باشوورێ كوردستانێ و ناڤچهیێ، ههموهخت مهسهلا بودجهیا وهلات و پهیمانا شهنگالێ ب وهزیرێ ناڤخوه را نیقاش كرن.
مهسروور بارزانی د ڤێ دهربارێ دا وهزیرێ ناڤخوه یێ ئیراقێ ژ گرنگییا جی ب جی كرنا پهیمانا شهنگالێ و دهركهتنا میلیشیا و هێزێن چهكدارێن نهیاسایی ژ ناڤچهیێ هایدار كر، ههموهخت باس ل خهتهرییا گوههرینا دهمۆگرافی و دهست درێژییا ل سهر وهلاتیێن كورد و داگیركرنا زهڤیێن وان یێن چاندنێ ل كهركووكێ و ناڤچهیێ كوردستانی كر.
مهسروور بارزانی ژ وهزیرێ ناڤخوه یێ ئیراقێ را گۆت كو ئهڤ رهوش نه دبهرژهوهندییا چ ئالییان دا یه و پێویسته رێ لێ بهێته گرتن.
د بهشهكا جڤینێ دا، سهرۆكوهزیر و وهزیرێ ناڤخوه دیالۆگا ههولێر و بهغدایێ یا ل دهربارا بودجهیا وهلات یا سالا 2021ێ نیقاش كر، ههموهخت ههلبژاتنێن پێش مه یێن پارلمهنا ئیراقێ.
هێژای گۆتنێ یه، حكوومهتا باشوورێ كوردستانێ و حكوومهتا ئیراقێ ل داوییا سالا رابووری ژ بۆ ئاسایی كرنا رهوشا شهنگالێ پهیمانهك ئیمزا كر، ئهڤ پهیمان رێ ب ئاڤهدانكرنا شهنگالێ و ڤهگهرینا ئاوارهیێن ئێزدی ددهت، ههم دهم پێویست كرییه چهكدارێن رێخستنا پهكهكێ و حهشدا شهعبی ژ شهنگال دهربكهڤن، لێ بهلێ ئهڤ پهیمان نههاتییه جی ب جی كرن و پهكهكه و شریكێن وان یێن حهشدا شهعبی بوونه ئاستهنگییا سهرهكی ل همبهر جی ب جی كرنا ڤێ پهیمانێ.