ل ئێلھێ زرخپۆشەک ھەول ددەت زارۆکەکی کورد بپەرچقینیت
بەلاڤبوونا دیمەنەکێ ڤیدیۆیی یێ ھەولدانا پەرچقاندنا زارۆکەکێ کورد یێ ئاکنجیێ باژارێ ئێلھا باکورێ کوردستانێ ل سەر تۆرێن جڤاکی ژ ئالیێ زرخپۆشەکا سەر ب رێڤەبەریا پۆلیسێن باژێری ڤە بوو سەدەما گەلەک کارڤەدانان.
د وی دیمەنی دا کو ل تاخا رەزانا ئێلھێ ھاتیە تۆمارکرن و ژ ئالیێ رێخستنا ھەدەپێ یا ئێلھێ ڤە ل سەر تۆرێن جڤاکی ھاتیە بەلاڤکرن، زرخپۆشەکا رێڤەبەریا پۆلیسێن ئێلھێ بلەز دکەڤیتە مەیدانەکێ کو ھەژمارەک زارۆک و خۆرت لێ کۆم بوونە.
وەک د دیمەنان دا دهێتە دیتن، کو ب مۆبایلا وەلاتیەکی ل نێزیکێ جھێ بوویەرێ ھاتیە تۆمارکرن، داکو زارۆک ژ ئالیێ زرخپۆشێ ڤە نەیێن پەرچقاندن، درەڤن و ھەول ددەن خوە رزگار بکەن. زرخپۆش راناوەستیت و ددەتە پەی زارۆکەکێ و ھەول ددەت بپەرچقینیت، پشترا زارۆک خوە خەلاس دکە.
رێخستنا ھەدەپێ یا ئێلھێ رۆژا یەکشەمێ 28ێ شوباتا 2021ێ ل سەر تۆرا جڤاکی یا تویتەرێ ئەو دیمەنێ ڤیدیۆیی بەلاڤ کریە و داخوازێ ژ وەزارەتا ناڤخوەیا ترکیێ و ھێزێن ئەولەکاریێ دکەت کو بێن سەر خەتێ و لێپرسینێ دەربارێ وان کەسان دا بدەنە دەستپێکرن کو ب وی ئاوایی تەڤدگەرن. حەتا نھا هیچ ئالیەکێ فەرمی دەربارێ بوویەرێ داخویانی نەدایە.
