هه‌سه‌دێ ب ته‌رزێ رژێما ئه‌سه‌د 3 زارۆك پێش بابێ وان ڤه ره‌ڤاندن

هه‌سه‌دێ ب ته‌رزێ تاوانێن رژێما ئه‌سه‌د 3 زارۆك پێش كه‌سه‌كی ڤه ره‌ڤاندن

هێزێن سووریایا ده‌مۆكراتیك، مالباته‌كا‌ 8 كه‌سی كو 3  ژێ زارۆكن و د ته‌مه‌نا 3 بۆ 6 سالیێ دا نه‌، پێش بابێ وان ڤه‌ ره‌ڤاندینه‌ و ئه‌ڤ ده‌ما 48 رۆژانه‌ ل جه‌م وان د گرتیگه‌هێ دا نه‌، هه‌سه‌ده‌ دبێژیت‌: «هه‌تا كو بابێ وان خوه‌ راده‌ست نه‌كه‌ت، ئه‌و زارۆكێن وی به‌رناده‌ن»، مالباتا وان ژی بانگ ل مازلووم عه‌بدی كر كو ب ئه‌ركێ خوه‌ یێ ئه‌خلاقی رابیت‌ و وان زارۆكان سه‌ربه‌ست به‌رده‌ت‌.

نیدال ئیبۆ، ئه‌ندامێ ئه‌نجوومه‌نا له‌شكه‌ری یا منبجێ كو گرێدای هه‌سه‌دێ یه‌، به‌رییا 2 مه‌هان ل سه‌ر مه‌سه‌له‌یا دزی و گه‌نده‌لیێ خوه‌ ژ ئه‌نجوومه‌نێ ڤه‌كێشا و پشتره‌ ل سۆسیال مه‌دیایێ ده‌ركه‌ت و باس ل جینایه‌تێن دزی و گه‌نده‌لییا به‌رپرسێن ئه‌نجوومه‌نێ كر، ل سه‌ر ڤێ، هه‌سه‌دێ فه‌رمانا ده‌سته‌سه‌ر كرنا وی دا و وه‌ختا كو نكارین وی ده‌سته‌سه‌ر بكه‌ن، مالباتا وی كو ژ 8 كه‌سان پێك دهێت ده‌سته‌سه‌ر كرنه‌ و وه‌ك دیل د گرتیگه‌هێن خوه‌ دا هێلاینه‌.

ل گۆری ئاگاهیێن ده‌ستێ مه‌، ئه‌ڤ ده‌ما 48 رۆژانه‌ مالباتا نیدال ئیبۆ د گرتیگه‌هێن هه‌سه‌دێ دا نه‌، ئه‌ڤ ژی ناڤێن وانه‌:

  1. مەحموود ئیبۆ 60 سال

  2. رێزان ئیبۆ 24 سال

  3. ئەحمەد ئیبۆ 16 سال

  4. محەمەد ئیبۆ 14 سال

  5. ئەمیرا بەتران 23 سال

هه‌روه‌ها ھەرسێ زارۆک

  1.  مەحموود 6 سال.

  2. لەزگین 4 سال.

  3. ئارین 3 سال.

مالباتا هه‌ر 8 ره‌ڤاندییان ل رۆژا 27/2/2021ێ، داخویانی به‌لاڤ كر و بانگ ل هه‌سه‌دێ و مازلووم عه‌بدی فه‌رماندارێ گشتیێ هه‌سه‌دێ كر كو ب ئەرکێ خوەیێ یاسایی، رەوشتی، و جڤاکی رابیت و چارەنڤیسا ئەندامێن کو وەکە دیل ھاتینە گرتن، دیار بکەت.

د. لەزگین ئیبۆ، پێش مالباتێ ڤه‌ داخویانی دا و گۆت: 48 رۆژن، 8 ئەندامێن مالباتا مه‌ ژ ئالیێ ئەنجوومەنا منبجێ یا لەشکەری کو سەر ب هه‌سه‌دێ ڤەیە هاتینه‌ ره‌ڤاندن و وەک دیل ل جەم خوە گرتینە، ھەتا کو نیدال ئیبۆ خوە رادەست بكه‌ت، نیدال ژی ب جینایه‌تا گەندەلیێ ژ ئالیێ وێ ئەنجوومەنێ ڤە دهێته‌ خوەستن، و بەرییا دەمەکی دەست ژ ئەنجوومەنا منبجێ كێشا بوو.

داخویانیێ بانگا ل مەزلووم کۆبانی کر کو بەرپرسیارەتیێ ل ھەمبەر گەل و ھەڤپەیمانییا ناڤدەولەتی ھه‌لگریت و چارەنڤیسا مالباتێ دیار بکەت و د زووترین دەم دا، سەربەست بەردەت، ھەروەھا چاڤدێرییا تەندروستیێ ژ بابێ وی یێ نەخوەش را دابین بکەت و زارۆکان ڤەگەرینیت خواندنگه‌هێن وان.

داخویانیێ ھەروەھا دا زانین ژی کو ھەر کەسەکێ دەست د ڤێ تاوانا گه‌نده‌لیێ دا ھەیە سزا بدەت و دادگەھ بکەت و دەرەنجامێ دۆسەیێن گەندەلیێ ژ بۆ رایا گشتی و راگھاندنێ ئەشکەرە بکەت.

هه‌روه‌ها دوهی رۆژا دووشه‌مبی ژی، دایكا نیدال ئیبۆ په‌یامه‌ك ڤیدیۆیی به‌لاڤ كرو تێدا داخواز ژ مه‌زلووم عه‌بدی و هه‌سه‌دێ كرییه‌، وان زارۆكان ئازاد بكه‌ت و گۆتییه‌ مه‌زلووم كو زارۆكان چ گونه‌ها خوه‌ نینه‌ ته‌ كرینه‌ ره‌هینه‌.

ئه‌ڤ ژی گۆتنێن دایكا نیدال ئیبۆ نه‌:

ژ دەما کو نیدال ئیبۆ ژ ئەنجوومەنا منبنجێ جودا بووی، ل سەر وەشانا زیندی ل سەر تۆرێن جڤاکی دەرکەت و بەحسا گەندەلییا بەرپرسێن ئەنجوومەنێ کر، ژ وێ دەمێ ڤە 8 ژ ئەندامێن مالباتا وی وەک دیل ھاتنە گرتن.

ژ دەما کو ل سەر راگھاندێ ھاتییە بەلاڤ کرن، رەڤاندنا 8 ئەندامان ل ھەمبەر خوەرادەستکرنا نیدال ئیبۆ بوویە جھێ شەرمەزاری و رێسواکرنێ و بانگا سەربەستبەردانا وان ئەندامان دهێته‌ کرن.