ھاتە راگھاندن کو ل باشوورێ ئیراقێ بۆمبە ب کاروانەکێ ھێزێن ھەڤپەیمانیا ناڤدەولەتی یا دژی داعشێ دا ھاتیە تەقاندن کو بەریا وێ ژی ئیرۆ دانێ سپێدێ ل پارێزگەھا موسەننایێ دیسا بۆمبە ب کاروانێ ھەڤپەیمانیێ ڤە ھاتبوو تەقاندن.
ل گۆری زانیاریان ئیرۆ 3یێ ئادارێ ل سەر رێکا پارێزگەھا دیوانیێ بۆمبەیەکا چاندی ب کاروانێ ڤەگوھەستنا ئالاڤێن لەشکەری و لۆژیستیکی یێن ھێزێن ھەڤپەیمیێ ڤە ھاتە تەقاندن.
ھات دیارکرن کو د ئەنجاما تەقینێ دا هیچ زیانەکا جانی چێنەبوویە، لێ ترۆمبێلەکا د ناڤ کاروانی دا زیان دیتیە.
بەریا وێ ئێریشێ، ئیرۆ دانێ سپێدێ ل سەر رێکا پارێزگەھا موسەننا بۆمبەیەک ب کاروانەکێ ھێزێن ھەڤپەیمانان ڤە ھاتبوو تەقاندن.
ھەڤدەم ئیرۆ ئێریشەکا مۆشەکی ژی ل دژی بارەگەھا عەین ئەسەد یا ئەمریکایێ کو ل ئەنبارێ یە ھاتبوو کرن و 10 مۆشەک ل نێزیکی بارەگەھێ کەتبوون.
ل گۆری نرخاندنان ئەڤ ئێریشێن داوی یێن ل دژی ھێزێن ھەڤپەیمانیێ، وەکی بەرسڤەکا چەکدارێن میلیشیایێن ئیرانی یە کو بالەفرێن ئەمریکایێ پشتی ئێریشێن سەر ھەولێرێ، چەند رۆژ بەرێ ل سووریێ بارەگەھێن وان بۆمبەباران کربوون.
