ھلمەتا ڤاکسینکرنێ ل باشوورێ کوردستانێ دەستپێکر

ئیرۆ ھلمەتا ڤاکسینکرنا ل دژی ڤیرووسا کۆرۆنایێ ل ھەرێما باشوورێ کوردستانێ دەستپێکر، د دەستپێکێ دە ژی، پژیشک و کارمەندێن تەندروستیێ ڤاکسینێ وەردگرن.

کارمەندێ تەندروستیێ گۆران ئۆسمان بایز کو یەکەم کەسێ ڤاکسین وەرگرتیە ژ كوردستان 24ێ رە راگھاند، «ھەست ب خوەشیێ دکم کو ئەز یەکەم کەسم ڤاکسینێ وەردگرە، ئەز دخوازم ھەر کوردەک بچە و ڤاکسینێ وەربگرە، ب ھێڤییا کو ئەم ژ ڤێ نەخوەشیێ خەلاس ببن.«

پێر 2ێ ئادارێ کاروانێ یەکەما ڤاکسینا سنۆپھارم یا چینی گھیشت ھەرێما کوردستانێ کو ژ 5 ھەزار ڤاکسینان پێک دھات، ئەو ڤاکسین ل سەر بنکەیێن تەندروستیێ یێن پارێزگەھان ھاتن بەلاڤ کرن.

وەزیرێ تەندروستیێ د. سامان بەرزنجی راگھاند، د قۆناخا یەکەم دە، لێدانا ڤاکسینێ ل 8 ناڤەندان دەستپێ دکە.

د وێ دەربارێ دە کۆنسۆلێ چینێ ل ھەولێرێ راگھاندبوو، ئەوێ ل گەل حکوومەتا ھەرێما کوردستانێ ژ بۆ دابینکرنا ڤاکسینێ بەردەوام بن.