مه‌سروور بارزانی: ب هێڤینه‌ رێ ل به‌ر بنپێكرنێن ل عه‌فرینێ  بێ گرتن

سەرۆکوەزیرێ ھەرێما باشوورێ کوردستانێ، مەسروور بارزانی ئیرۆ پێشوازی ل سەرۆکێ ھەڤپەیمانییا نشتمانییا ئۆپۆزیسیۆنا سووریێ و شاندا د گه‌ل دا كر، ره‌وشا عه‌فرینێ و چاره‌سه‌ركرنا پرسگرێكا سووریێ گۆتووبێژکرن.

د ھەڤدیتنێ دا، پێشھاتێن داویێ یێن رەوشا سیاسییا سووریێ و ناڤچەیێ و ھەولا چارەسەرکرنا پرسگرێکێن سووریێ ھاتن گۆتووبێژکرن.

سەرۆکێ ھەڤپەیمانییا نشتمانییا ئۆپۆزیسیۆنا سووریێ نه‌سر حه‌ریری، سپاسییا ھەلوەستا دۆستانە یا ھەرێما باشوورێ کوردستانێ کر یا ل ھەمبەر گەلێ سووریێ و داخوازیێن و ان یێن رەوا، ب تایبەت مێڤانداریکرنا ب سەدان ھەزار کۆچبەرێن سووری ل ھەرێما کوردستانێ و وێ ھەڤکارییا ل گەل وان کری.

سەرۆکوەزیرێ باشوورێ کوردستانێ دەستنیشان کر، ھەرێما کوردستانێ پشتەڤانیێ ل ھەر ھەولەکێ دکەت ژ بۆ چارەسەرکرنا پرسگرێکێن سووریێ ب ئاوایەکی ئاشتییانە و ب ئاراستەیا بجھبوونا ئارامی و ئاشتیێ ل ناڤچەیێ و دابینکرنا مافێن ھەموو پێکھاتە و گەلێن سووریێ، د ناڤا وان دا ژی مسۆگەرکرنا داخوازێن رەوا یێن گەلێ کورد ل رۆژئاڤا كوردستانێ.

سەرۆکوەزیرێ ھەرێما کوردستانێ دلگرانییا خوە ژی ل ھەمبەر بنپێکرنێن ل عەفرینێ دبن نیشان دا و ھێڤی خواست کو رێ ل وان بنپێكرنان بهێته‌ گرتن.