کالەمێرەکێ عەفرینی د بن ئەشکەنجەیا چەکدارێن ترکیا دا ھاتە کوشتن

کالەمێرەکێ عەفرینی د بن ئەشکەنجەیا چەکدارێن ترکیا دا ھاتە کوشتن

کالەمێرەکێ کورد یێ عەفرینی ب دەستێ چەکدارێن سەر ب ترکیا ڤە ھاتە ئەشکەنجەدان و کوشتن.

رێخستنا مافێن مرۆڤان ل عەفرینێ بەلاڤ کر، وەلاتیێ ب ناڤێ شێخمووس قاسم یێ 73 سالی کو رۆژا 3یێ ئادارا ئیسال ژ ئالیێ گرۆپا چەکدار یا ب ناڤێ فەیلەق ئەل-شام ڤە ھاتبوو رەڤاندن، ژ بەر کو د گرتیگەھێ دا راستی ئەشکەنجەیێن ھۆڤانە ھاتبوو، چەکداران مالباتا وی ئاگاھدار کرن دا کو وی ڤەگوھێزن نەخوەشخانەیێ، لێ د رێکێ دا جانێ خوە ژ دەست دا.

وێ رێخستنێ دیار کر، شێخمووس قاسم رۆژا 3یێ ڤێ مەھێ لگەل محەمەد خەلیل حاج شێخۆ و سەید قەنبەر ژ ئالیێ چەکدارێن فەیلەق ئەل-شام ڤە ھاتبوون رەڤاندن.

ئەڤو نە جارا یەکەمە وەلاتیەکی عەفرینێ د بن ئەشکەنجەیا ھۆڤانەیا گرۆپێن چەکدار دا دهێتە کوشتن. ژ بەر کو ژ دەما داگیرکرنا عەفرینێ د 18ێ ئادارا 2018ێ دا و حەتا نھا، زێدەتر ژ 40 وەلاتیێن کورد د بن ئەشکەنجەیا چەکداران دا ھاتنە کوشتن.