ئیرانێ 33 ژنێن كورد ب زیندان كرن و لێدانا قامچییان جه‌زا كرن
ژ رۆژا 8 مارسا سالا رابووری 2020ێ، هه‌تا ئیرۆ رژێما ئیرانێ 33 ژنێن كورد ب زیندان كرنێ و لێدانا قامچییان جه‌زا كرینه.
رێخستنا هه‌نگاو یا مافێن مرۆڤان، ئیرۆ 8 مارسێ كو رۆژا جیهانی یا ژنانه، ئامارا ساله‌كێ یا ژنێن كورد ل رۆژهلاتا كوردستانێ ئه‌شكه‌ره كر و ل گۆری وێ ئامارێ، رژێما ئیرانێ، ژ رۆژا 8 مارسا سالا رابووری 2020ێ، هه‌تا رۆژا مه یا ئیرۆ 33 ژن ب زیندان كرن، ئه‌شكه‌نجه و لێدانا قامچییان جه‌زا كرینه.
رێخستنا هه‌نگاوی ده‌ست نیشان كر، چالاکێن ژن یێن كورد ساله‌كا پر ب ئێش ل رۆژهلاتا كوردستانێ ل ژێر سته‌ما رژێما ئیرانێ ده‌رباس كرینه.
ل گۆری راپۆرتا رێخستنا هه‌نگاوێ، 11 ژنێن كورد د ڤێ ده‌مێ دا ب لێدانا قامچییان ژ هێلا ده‌زگه‌ها دادوه‌رییا رژێما ئیرانێ ڤه هاتینه جه‌زا كرن، ئه‌ڤ جه‌زا ژی ب سه‌ده‌ما چالاكیێن مه‌ده‌نی ل سه‌ر هاتییه سه‌پاندن.
