رایه‌دارێن سلێمانیێ دوو «حیتێن» مه‌زن ده‌رباس كرنه‌ ئه‌ورۆپا

رایه‌دارێن سلێمانیێ دوو «حیتێن» مه‌زن ده‌رباس كرنه‌ ئه‌ورۆپا

حكوومه‌تا ئیراقێ به‌رپرسه‌كێ خوه‌ ب سووچا دزینا په‌ره‌یێن ده‌وله‌تێ و گه‌نده‌لیێ ده‌سته‌سه‌ر كر، لێ به‌لێ كوڕێن وی كو بریارا ده‌سته‌سه‌ر كرنا وان ژی ده‌ركه‌تبوو، ب ئالیكارییا هنده‌ك كه‌سان ل سلێمانیێ ب په‌ره‌یێن زۆر ڤه‌ ده‌رباسی تركیێ و ئه‌ورۆپایێ بوون.

چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره‌ كر، به‌رپرسه‌كێ دیار یێ حكوومه‌تا ئیراقا فه‌ده‌رال كو نها ب سووچا گه‌نده‌لیێ ده‌سته‌سه‌ر كرییه‌ كاری كوڕێن خوه‌ د سلێمانیێ را ژ ئیراقێ ده‌ربێخیت، كوڕێن ڤی به‌رپرسی ل سلێمانیێ ڤیزایا تركیێ وه‌رگرتنه‌ و ل بنگه‌ها سه‌رچنار ژی ته‌ستا كۆڤیدێ كرن و پشتره‌ ل باله‌فرێ سوار بوون كو په‌ره‌یێن زۆر ل گه‌ل خوه‌ برنه‌.

ل گۆری ئاگاهیێن ده‌ستێ مه‌، شاكر زاملی یێ به‌رپرسێ ده‌سته‌یا وه‌به‌رهێنانێ د حكوومه‌تا فه‌ده‌رال یا ئیراقێ دا‌، ب سووچا گه‌نده‌لیێ هاتییه‌ ده‌سته‌سه‌ر كرن، بریار بوو هه‌ردوو كوڕێن وی ژی بهێنه‌ ده‌سته‌سه‌ر كرن، لێ به‌لێ ئه‌و ل ده‌ستپێكێ ره‌ڤیانه‌ سلێمانیێ.

د ڤێ ده‌ربارێ دا،‌ عه‌لی عه‌شماوی یێ به‌رپرسێ زێرڤانێن شاكر زاملی داخویانی دا و گۆت: «ل ده‌ستپێكا مه‌ها 11 یا سالا رابووری 2020ێ، دوو كوڕێن شاكر زاملی ل سلێمانیێ بوون و ڤیزایا تركیێ ل وێرێ پێ هاتییه‌ دان، وان ل رۆژا 11/11/2020ێ ل بنگه‌ها ته‌ندروستی یا سه‌رچنارێ ژی ته‌ستا كۆڤیدێ ئه‌نجام داییه‌ ژ بۆ كو باز ده‌نه‌ تركیێ.

 ناڤبووری ده‌ست نیشان كر، ته‌ستا كوڕێن شاكر زاملی ل رۆژا 12/11/2020ێ ده‌ركه‌تییه‌ و د هه‌مان رۆژێ دا‌، ئه‌و ب رێیا باله‌فرخانه‌یا سلێمانیێ ل باله‌فرێ سواربوون و ده‌رباسی تركیێ بوونه‌ و ژ وێرێ به‌ر ب ئه‌ورۆپایێ چووینه‌.

عه‌لی عه‌شماوی دبێژیت‌: «دادگه‌ها ئیراقێ بریارا ده‌سته‌سه‌ر كرنێ ژ بۆ كوڕێن شاكر زاملی ده‌رخستبوو، لێ به‌لێ ئه‌و ره‌ڤیانه‌ سلێمانیێ و په‌ره‌یه‌كێ مه‌زن و كه‌لوپه‌لێن گران بها ل گه‌ل خوه‌ برنه‌ تركیێ».

د ته‌عقیبا ڤێ بابه‌تێ دا‌، چاڤكانیێن پێگه‌ها داركا مازی ل باشوورێ كوردستانێ كارین هنه‌ك ئاگاهییان ب ده‌ست بێخن و ل گۆری وان ئاگاهییان: كه‌سێ ب ناڤێ (ی.ح.ش) كو رایه‌داره‌كێ ته‌ندروستیێ یه‌، وی ناڤبه‌ینكاری ژ بۆ كوڕێن شاكر زاملی كرییه‌ ژ بۆ كو ته‌ستێن وان یێن كۆڤیدێ زوو بهێنه‌ ده‌رخستن، ژ به‌ر كو ژ بۆ كۆچكرنا ده‌رڤه‌ ئه‌و ته‌سته‌ پێویستن‌.

چاڤكانیێن مه‌ ئه‌شكه‌ره‌ كر، ل سپێده‌هییا رۆژا 12/11/2020ێ، كوڕێن شاكر زاملی ب ئالیكارییا ڤی به‌رپرسێ ته‌ندروستیێ، ته‌ستێن خوه‌ وه‌رگرتنه‌ و ل هه‌مان رۆژێ ئه‌و سواری باله‌فرێ بوون و ده‌رباسی تركیێ بوونه‌.

هێژای گۆتنێ یه‌، شاكر زاملی ل سالا 2016ێ بوویه‌ به‌رپرسیارێ ده‌سته‌یا وه‌به‌رهێنانێ و ل سالا رابووری ل سه‌ر دزینا په‌ره‌یێن ده‌وله‌تێ و گه‌نده‌لیێ هات مه‌حكه‌مه‌ كرن.