باله‌فرێن ده‌وله‌تا تركیێ ئیرۆ لڤ و ته‌ڤگه‌رێن رێخستنا په‌كه‌كێ ل دوو گوندێن باشوورێ كوردستانێ ل سینۆرێ پارێزگه‌هییا دهۆكێ هه‌ده‌ف كرن، هێرش ل هنداڤا ڤان گوندان پێكهاتییه و خه‌ته‌ری كه‌تییه سه‌ر خه‌لكێ ڤان گوندان.
چاڤكانیێن پێگه‌ها داركا مازی ل باشوورێ كوردستانێ ئه‌شكه‌ره كر، ئیرۆ رۆژا یه‌كشه‌مبی 13/3/2021ێ، باله‌فرێن ده‌وله‌تا تركیێ ل دوو گوندێن باشوورێ كوردستانێ هێرشا چه‌كدارێن رێخستنا په‌كه‌كێ كر.
هێرشا یه‌كه‌م ل ده‌مژمێر 1:15 پاش نیڤرۆژێ پێكهاتییه و باله‌فران ل چیایێ ره‌شكێ یێ هنداڤا ده‌ڤه‌را سۆرێ سگێرێ ل باكورێ گوندێ سگێرا كه‌ڤن یێ گرێدای ناڤچه‌یا دێره‌لۆكێ ل ده‌ڤه‌را نهێلییا بۆرۆدمان كرنه، باله‌فران د ڤێ هێرشێ دا یه‌ك رۆكێت ل خالێن په‌كه‌كێ دایه.
هێرشا دوویه‌مین ل ده‌مژمێر 2:40 ئێڤارێ پێكهاتییه و باله‌فران خالێن په‌كه‌كێ ل هنداڤی گوندێ كركو بناڤی یێ ده‌ڤه‌را نهێلێ بۆرۆدمان كرن.
ل گۆری دیمه‌نێن ڤان هێرشان كو ژ بۆی پێگه‌ها مه هاتنه شاندن، جهێن كو كه‌تنه به‌ر هێرشان نێزی گوندانه و ئه‌ڤ یێك بوویه خه‌ته‌ری ل سه‌ر خه‌لكێ وان گوندان.
رێخستنا په‌كه‌كێ ژ بۆ كو خوه ژ هێرشێن باله‌فرێن تركیێ بپارێزیت، حه‌ره‌كه‌تا چه‌كدارێن خوه ئێخستییه ناڤا گوند و دۆربه‌رێن باژارۆكێن باشوورێ كوردستانێ، خه‌لكێ باشوور پر ژ ڤێ هه‌نگاڤا په‌كه‌كێ عاجزن و ئه‌و دخوازن چه‌كدارێن په‌كه‌كێ ژ گوندێن وان دوور بكه‌ڤن ژ بۆ كو نه‌كه‌ڤن به‌ر هێرشێن باله‌فران.
