عەزیز وەیسی: پەکەکە ژ رێ دەرکەتیە

عەزیز وەیسی: پەکەکە ژ رێ دەرکەتیە

فەرماندەیێ ھێزا زێرەڤانی یا پێشمەرگە دبێژیت، رەوشا دەڤەرێن کوردستانی رۆژ ب رۆژ ئالۆزتر دبیت و پەکەکە ژی ژ رێ دەرکەتیە.

فەرماندەیێ ھێزا زێرەڤانی یا پێشمەرگە، عەزیز وەیسی د جڤینەکا رۆژنامەڤانی دا ل چیایێ زەرتک راگھاند، رەوشا دەڤەرێن کوردستانی ئالۆزە و رۆژ ب رۆژ ژی ئالۆزتر دبیت. ب تایبەت پشتی خیانەتا 16ێ جۆتمەھا 2017ان، خەلک ژ بەر میلیشیایێن حەشدا شەعبی ژ مال و وارێ خوە درەڤیت و گەلەک ژ وان نیگەرانە.

عەزیز وەیسی ھەر وھا گۆت، دڤێت پێشمەرگە ڤەگەریتە وان دەڤەران و تەنێ ھێزێن پێشمەرگە و ئارتێشا ئیراقێ دکارن وێ رەوشێ چارەسەر بکن.

ل سەر خرابکاریێن پەکەکێ ل ھەرێما کوردستانێ ژی، وی فەرماندەیێ پێشمەرگە گۆت، رەوشا شنگالێ ئالۆزتر بوویە و ھندی دچیت خرابتر ژی دبیت. دڤێت رێکەفتنا شنگالێ بهێتە بجیھئانین و ھێزێن نە یاسایی ژێ دەرکەڤن.

عەزیز وەیسی ھەر وەھا گۆت، مخابن پەکەکە پشتی گرتنا ئۆجالان، ژ ئارمانج و رێیا خوە دوور کەتیە و ل دژی کوردان دهێتە بکارئانین. ل ناڤ پەکەکێ دا ھندەک کەسێن نشتمانپەروەر ھەنە لێ رێگری ل وان دهێتە کرن و ناھێلن ئەو پەکەکێ ڤەگەرینن سەر رێیا خوە.