بلا بیرهاتنا ب ئێش یا ھەلەبجە ببیته‌ ئه‌گه‌را یەکرێزییا کوردی

بلا بیرانینا ب ئێش یا ھەلەبجە ببیته‌ سەدەما یەکرێزییا کوردی

ئەنجوومەنا نشتمانییا کوردی ل سووریێ ئه‌نه‌كه‌سێ د داخویانیەکێ دا کیمیابارانا ھەلەبجە ژ هێلا رژێما به‌عس یا ئیراقێ ڤە شەرمەزار کر و بانگ ل گەلێ کورد کر، ئەڤ بیرانینا ب ئێش ببیته‌ ھاندانەک ژ بۆ یەکرێزییا کوردی.

سكرتاریه‌تا گشتی یا ئه‌نه‌كه‌سێ ئیرۆ د داخویانیەکێ دا راگھاند، رژێما رووخاندی یا به‌عس یا ئیراقێ رۆژا 16ێ ئادارا 1988ێ کۆمکوژییەک د دەرھەقێ خەلکێ ھەلەبجە و گوندێن دەردۆرا وێ دا کر کو بوو سەدەما شەھیدبوونا زێدەتری 5 ھەزار کەسان و برینداربوونا نێزی 10 ھەزار کەسێن دی کو پرانییا وان زارۆک و ژن بوون.

ئه‌نه‌كه‌سێ دیار کر، ئەڤ ئێریش یەک ژ ئێریشێن ھەری گرانێن کیمیاوی یێن ل دژی وەلاتیێن سڤیل هاتییه‌ ب كارئانین، ژ بەر ھۆڤیتییا ڤێ ئێریشا ل سەر گەلێ کورد ھاتییە کرن، ھەموو مرۆڤاتی و ویژدانا جیھانێ ھەژییا.

ئه‌نه‌كه‌سێ د بەشەکا دی یا داخویانییا خوە دا گۆت: ئەم وەک ئەنجوومەنا نشتمانییا کوردی ل سووریێ، ل گەل کو ڤێ تاوانێ شه‌رمەزار دکه‌ین، بانگ دکه‌ین کو رۆژا 16ێ ئادارێ ببیته‌ رۆژەکا جیھانییا قەدەخەکرنا چەکێ کیمیایی.

ئه‌نه‌كه‌سێ د داخویانیا خوە دا، بانگ ل گەلێ کورد کر، ئەڤ بیرانینا ب ئێش ببیته‌ ھاندانەک ژ بۆ یەکرێزییا کوردی ل دژی رکبەرییان و ژ بۆ پاراستنا دەستکەفتیێن کو سەرکرداتییا ئاقلمەندا ھەرێما کوردستانێ ب دەست ڤە ئانینە.

ھەروه‌ھا ئه‌نه‌كه‌سێ بانگ ل گەلێ کورد کر، رۆژا 16ێ ئادارێ د دەمژمێر 11:00 دا ل سەر رێ و ل پێش مال و دکانان 5 خوله‌كێن بێدەنگ ژ بۆ گیانێن شەھیدێن ھەلەبجەیێ راوەستن.